(ភ្នំពេញ)៖ លោកវេជ្ជបណ្ឌិត សុខ ចិត្ត ដែលត្រូវបានគេស្គាល់ថា ជាអ្នកដឹកនាំអ្នកសិល្បៈស្ម័គ្រចិត្តប្រុសស្រីល្បីៗ ឲ្យចូលរួមបរិច្ចាគឈាមជួយដល់សង្គម ជារៀងរាល់ឆ្នាំនោះ កាលពីពេលថ្មីៗនេះ លោកពិតជាបានទទួលបាននូវមោទនភាពមួយ សម្រាប់ជីវិតរបស់ខ្លួន ដោយទទួលបាននូវ មេដាយសហគ្រិនឆ្នើម CEO Award ពីសំណាក់លោក ហ៊ុន ម៉ាណែត ដែលរៀបចំឡើង ដោយលោក អោម សេងបូរ៉ា ជាស្ថាបនិក CEO Master Club។
លោក វេជ្ជបណ្ឌិត សុខ ចិត្ត បានថ្លែងពីចំណាប់អារម្មណ៍រំភើបថា «នេះជាមហាកិត្តិយស និងសេចក្តីរំភើបរីករាយក្រៃលែង ដែលរូបខ្ញុំបានទទួល «មេដាយសហគ្រិនឆ្នើម CEO Award» ពីឯកឧត្តម ឧត្តមសេនីយ៍ឯក ហ៊ុន ម៉ាណែត ដែលរៀបចំដោយលោក អោម សេងបូរ៉ាស្ថាបនិក CEO Master Club ក្នុងគោលបំណងជួយបង្កើតការងារ ដល់សង្គមនិងបង្កើនប្រាក់ចំណូល ជូនប្រជាពលរដ្ឋ។ សូមគោរពជូនពរឯកឧត្តម និងក្រុមគ្រួសារទទួលបាននូវសុខភាពល្អ និងជោគជ័យគ្រប់ភារកិច្ច»។
លោកបានបន្តថា «នេះជាកម្លាំងចិត្តមួយដ៏ធំធេង សម្រាប់ការពង្រីកវិសាលភាពសហគ្រិនកម្ពុជា ដើម្បីលើកស្ទួយសេដ្ឋកិច្ចក្នុងស្រុក ឱ្យរីកចម្រើន ហើយក៏ជាការរួមចំណែកក្នុងការធ្វើសេចក្តីល្អ ជួយដល់ខ្លួនឯងក្រុមគ្រួសារ និងសង្គមជាតិទាំងមូលឲ្យរីកចម្រើន។ រាល់ការខិតខំប្រឹងប្រែងទាំងអស់ គឺដើម្បីសេចក្តីសុខ កិត្តិយស និងការរីកចម្រើនផ្នែកទ្រព្យសម្បត្តិ រួមចំណែកបង្កើតការងារ ជូនសង្គមជាតិ»។
គួរបញ្ជាក់ថា លោកវេជ្ជបណ្ឌិត សុខ ចិត្ត បានចូលជាសមាជិក CEO Master Club នៅឆ្នាំ ២០១៨ លេខរៀង ៥៥៦ ហើយនេះជាលើកទី២ សម្រាប់រូបលោកក្នុងការទទួលបានមេដាយពី CEO Master Club ខណៈលើកទី១លោកទទួលបានពានរង្វាន់ «Master CEO Award» និងលើកទី២ ទទួលបានមេដាយជាសហគ្រិនឆ្នើម «CEO Award»។ ការទទួលបាននូវ មេដាយសហគ្រិនឆ្នើម នេះក៏បានលើទឹកចិត្តឲ្យរូបលោក ក្នុងការធ្វើជំនួញ ដើម្បីផ្ដល់មុខមាត់ដល់គ្រួសារ និងសង្គមជាតិ កាត់បន្ថយភាពក្រីក្រផ្ដល់ឱកាស ការងារជូនប្រជាជនកម្ពុជាបានច្រើន និងដើម្បីអភិវឌ្ឍន៍ប្រទេសកម្ពុជា ក្លាយជាប្រទេសមានបានឆាប់រហ័ស។
សូមជម្រាបថា CEO Master Club បានផ្ដល់ជូនសមាជិកសហគ្រិនឆ្នើមរបស់ខ្លួន នូវពានរង្វាន់ជាច្រើនផ្នែក រួមមានដូចជាទី១៖ ពានរង្វាន់ Master CEO Award គឺជាជ័យលាភីសម្រាប់ទទួលស្គាល់ នឹងលើកទឹកចិត្តសហគ្រិន ដែលបានតស៊ូខិតខំប្រឹងប្រែង កសាងសមត្ថភាពរបស់ខ្លួនឲ្យក្លាយជាអ្នកដឹក នាំធុរកិច្ចកំពូលជាមួយ CEO Master Club ចាប់ពី៨កម្មវិធីឡើងទៅ ដើម្បីឱ្យមានសមត្ថភាព ក្នុងការដឹកនាំគ្រប់គ្រងអាជីវកម្មរបស់ខ្លួន ពីតូចទៅធំ ពីលក្ខណៈគ្រួសារទៅស្តង់ដារ និងចូលរួមចំណែក អភិវឌ្ឍន៍សេដ្ឋកិច្ចក្នុងស្រុកឲ្យកាន់តែទទួលបានភាពរឹងមាំ៕