(កំពត)៖ ព្រឹត្តិការណ៍រត់ប្រណាំងអន្តរជាតិ ពាក់កណ្តាលម៉ារ៉ាតុង និងប្រណាំងកង់លើកទី៦ បានប្រព្រឹត្ដទៅនៅលើភ្នំបូកគោនៃខេត្តកំពត ដែលមានរយៈពេល២ថ្ងៃ ចាប់ពីថ្ងៃទី២៦-២៧ ខែតុលា ឆ្នាំ ២០១៩ បានបញ្ចប់ដោយជោគជ័យ។
ការរត់ប្រណាំងអន្តរជាតិពាក់កណ្ដាលម៉ារ៉ាតុង និងប្រណាំងកង់ប្រចាំឆ្នាំនៅលើភ្នំបូកគោនេះ គឺរៀបចំដោយសណ្ឋាគារឋានសួគ៌សុខាបូកគោ។
វាមិនត្រឹមតែជាការចូលរួម ដើម្បីភាពសប្បាយរីករាយ និងសុខមាលភាពប៉ុណ្ណោះទេ ប៉ុន្តែវាក៏ជាការចូលរួម ដើម្បីគាំទ្រដល់ការងារសប្បុរសធម៌ផងដែរ ពីព្រោះចំណូលដែលទទួលបានពីព្រឹត្តិការណ៍នេះ នឹងឧបត្ថម្ភដល់មន្ទីរពេទ្យគន្ធបុប្ផា។
ព្រឹត្តិការណ៍សប្បុរសធម៌នេះ គឺបើកចំហសម្រាប់ទាំងជនបរទេស និងប្រជាជនកម្ពុជា ដោយមិនកំណត់ពីអាយុចំពោះការត់ប្រណាំងបែបកម្សាន្ត (Fun Run) ហើយចំពោះអ្នកចូលរួមប្រណាំងកង់ គឺតម្រូវឲ្យមានអាយុចាប់ពី៩ឆ្នាំឡើងទៅ។
ព្រឹត្តិការណ៍រត់ប្រណាំងអន្តរជាតិពាក់កណ្តាលម៉ារ៉ាតុង និងប្រណាំងកង់លើកទី៦នេះ ផ្តល់ឱកាសដ៏មានអត្ថន័យបំផុតសម្រាប់អ្នកចូលរួមទាំងអស់ ពីព្រោះពួកគេបានរួមចំណែកគាំទ្រ ដល់មន្ទីរពេទ្យគន្ធបុប្ផា ហើយទន្ទឹមនឹងនេះដែរអ្នកចូលរួមក៏នឹងទទួលបាននូវបទពិសេសដ៏រីករាយ និងអនុស្សាវរីយ៍ ដែលមិនអាចបំភ្លេចបានជាមួយក្រុមគ្រួសារ និងមិត្តភក្តិ។
ចំពោះកម្មវិធីប្រណាំងកង់ គឺប្រព្រិត្តិនៅថ្ងៃសៅរ៍ទី២៦ខែតុលា មានចម្ងាយផ្លូវ៤ប្រភេទខុសៗគ្នា ក្នុងនោះមានចម្ងាយផ្លូវ ១០គ.ម ១៧គ.ម ៣៤គ.ម និង ៥១គ.ម។ វិញ្ញាសា១០គ.ម អ្នកចូលរួមត្រូវបានអាយុចន្លោពី៩-១៣ឆ្នាំ តម្លៃចុះឈ្មោះចាប់ពី៧-១២ ដុល្លារ។ វិញ្ញាសាចម្ងាយផ្លូវ១៧ គ.ម និង ៣៤ គ.ម អ្នកចូលរួមអាយុត្រូវមានអាយុចាប់ពី១៤ឆ្នាំឡើង ថ្លៃចុះឈ្មោះចាប់ពី១២-២៧ដុល្លារ។ វិញ្ញាសា ៥១ គ.ម អ្នកចូលរួមត្រូវមានអាយុចាប់ពី ១៨ឆ្នាំឡើងទៅ ថ្លៃចុះឈ្មោះសម្រាប់ជនបរទេសតម្លៃ៣២ដុល្លារ និងជនជាតិខ្មែរ តម្លៃ២២ដុល្លារ។
ចំពោះការរត់ប្រណាំងធ្វើឡើងនៅថ្ងៃអាទិត្យទី២៧ ខែតុលា ដោយរត់ពាក់កណ្ដាលម៉ារ៉ាតុង មានចម្ងាយ២១ គ.ម ហើយវិញ្ញាសាផ្សេងទៀត មានចម្ងាយផ្លូវ១០គ.ម ៥គ.ម និង៣គ.ម។ វិញ្ញាសារត់ពាក់កណ្តាលម៉ារ៉ាតុង ចម្ងាយ២១គ.ម គីឡូម៉ែត្របេក្ខជនត្រូវមានអាយុចាប់ពី១៦ ឆ្នាំឡើងទៅ ថ្លៃចុះឈ្មោះ៣២ដុល្លារសម្រាប់ជនបរទេស និង២២ដុល្លារសម្រាប់ខ្មែរ។
ចំពោះអ្នកចូលរួមរត់ប្រណាំងចម្ងាយ១០គម ត្រូវមានអាយុចាប់ពី១៣ឆ្នាំឡើងទៅ ហើយថ្លៃចុះឈ្មោះគឺ ២៧ដុល្លារសម្រាប់ជនបរទេស និង១៧ ដុល្លារសម្រាប់ខ្មែរ។ ចំណែកឯវិញ្ញាសាចម្ងាយ៥ និង ៣គម អ្នកចូលរួមគឺមិនគិតពីអាយុ ហើយថ្លៃចុះឈ្មោះគឺចាប់ពី ៧-១៧ ដុល្លារ។
ជ័យលាភីនៃការរត់ប្រណាំង និងប្រណាំងកង់ ទទួលបាននូវមេដាយ និងរង្វាន់ផ្សេងៗជាច្រើនទៀត។ ដោយឡែកអ្នកចូលរួមរត់ និងជិះកង់ទាំងអស់ក៏ទទួលបានមេដាយអនុស្សាវរីយ៍ ព្រះមុនីវង្សបូកគោម៉ារ៉ាតុង ម្នាក់មួយផងដែរ។
ព្រឹត្តិការណ៍នេះមានគោលបំណងលើកកម្ពស់សុខភាព ផ្តល់ភាពសប្បាយរីករាយដល់អ្នកចូលរួម ហើយអ្វីដែលកាន់តែសំខាន់ទៀតនោះ គឺដើម្បីបុព្វហេតុសប្បុរសធម៌។ អ្នកចូលក៏មានជម្រើស ក្នុងការស្នាក់នៅតាមលទ្ធភាព ដូចជានៅសណ្ឋាគារឋានសួគ៌សុខាបូកគោ ស្នាក់នៅតាមរយៈការបោះតង់ ឬនៅ Bokor Inn ជាមួយតម្លៃសមរម្យ។ ចំណែកឯនៅពេលយប់ គឺមានការប្រគំតន្ត្រី ដើម្បីញុំងឱ្យព្រឹត្តិការណ៍នោះកាន់តែសប្បាយរីករាយទ្វេឡើង។
ពីមួយឆ្នាំទៅមួយឆ្នាំ ព្រឹត្តិការណ៍រត់ប្រណាំងអន្តរជាតិពាក់កណ្តាលម៉ារ៉ាតុង និងប្រណាំងកង់នេះ គឺមានអ្នកចូលរួមកើនឡើងជាលំដាប់ ទាំងអ្នកចូលរួមរត់ និងចូលរួមអ្នកជិះកង់។
សណ្ឋាគារឋានសួគ៌សុខា ដែលស្ថិតនៅលើកំពូលភ្នំបូកគោ គឺមានអាកាសធាតុត្រជាក់ អមដោយទេសភាពដ៏ស្រស់ត្រកាល ដែលមានចម្ងាយត្រឹម៤៥នាទី ពីក្រុងកំពត និង១៧០នាទីពីរាជធានីភ្នំពេញ។
ភ្នំបូកគោ គឺជាគោលដៅទេសចរណ៍ប្រវត្តិសាស្ត្រដ៏ល្បីល្បាញ នៅក្នុងប្រទេសកម្ពុជា ដោយសាតែវាមានទេសទេសភាពដ៏អស្ចារ្យ នៃផ្ទាំងថ្ម ប្រាសាទ វាលស្រែ ៥០០ ផ្កាបំពង់ក្រឡោម និងទឹកជ្រោះពពកវិលជាដើម។
ចំណែកឯឧទ្យានជាតិព្រះមុនីវង្ស ដែលត្រូវបានគេស្គាល់ថាជាឧទ្យានជាតិបូកគោនោះ គឺមានទីតាំងស្ថិតនៅក្នុងស្រុកទឹកឈូ ខេត្តកំពត។ វាមានកំពស់ ១០៧៥ ម៉ែត្រពីនីវ៉ូទឹកសមុទ្រ៕