(ចិន)៖ តារាសម្ដែងវ័យក្មេងរបស់កម្ពុជា បានបង្ហាញខ្លួន នៅក្នុងមហោស្រពភាពយន្ត លើកទី៦ «Silk Road Film Festival» នៅខេត្តសៀងមិញ ប្រទេសចិន កាលពីពេលថ្មីៗនេះ ដោយក្នុងនោះ នាងបានទទួលបទពិសោធន៍ និងបង្ហាញពីមោទនភាពរបស់ខ្លួន លើវិស័យភាពយន្តរបស់កម្ពុជា ដែលមានឱកាសបានចូលរួម ក្នុងមហោស្រពអន្តរជាតិនេះ។ អាចនិយាយបានថា នេះមិនមែនតែមោទនភាពសម្រាប់តែតារាសម្ដែង ភិន សុដាលីស ឬផលិតកម្មមហាហង្សនោះទេ ពោលគឺជាមោទនភាព សម្រាប់វិស័យភាពយន្តរបស់កម្ពុជា ទាំងមូល ដែលមានឱកាសយករឿងរបស់ខ្លួន ទៅប្រកួតប្រជែងក្នុងព្រឹត្តិការណ៍អន្តរជាតិដ៏ធំនេះ។
ជាការពិត ចាងហ្វាង និងតារាសម្ដែង ក្នុងផលិតកម្មមហាហង្ស ត្រូវបានគណកម្មការមហោស្រពភាពយន្ត លើកទី៦ Silk Road Film Festival នៅខេត្តសៀងមិញ ប្រទេសចិន អញ្ជើញជាតារាកិត្តិយស ឲ្យចូលរួមចែករំលែកបទពិសោធន៍ នៅក្នុងមហោស្រពភាពយន្តអន្តរជាតិនេះ។ អ្នកដែលបានចូលរួមមានដូចជា លោក អុិន សុភិន ចាងហ្វាងផលិតកម្ម លោក ភឹម តារាវិបុល និង តារាសម្ដែងល្បីល្បាញ អ្នកនាង ភិន សុដាលីស ដែលជាតូអង្គក្នុងរឿង «ណូលីណូឡា» ដែលត្រូវបានជ្រើសនៅក្នុងមហោស្រព។
តារាសម្ដែងវ័យក្មេង ភិន សុដាលីស បានថ្លែងថា នាងពិតជារំភើប នៅពេលរូបនាង លោក ភឹម តារាវិបុល និង លោក អុិន សុភិន ប្រតិភូរឿង «ណូលីណូឡា» ត្រូវបានកាសែត និងទូរទស្សន៍ចិន ដាក់ថ្ងៃសម្ភាសន៍ ស្ទើររកពេលសម្រាកមិនបាន ដែលកាន់តែបំផុសឲ្យភាពយន្តខ្មែរ ទទួលបានការផ្ដល់តម្លៃ។ នាងមិនតូចចិត្តទេ ចំពោះឱកាសមិនទទួលបានពាន ឬរង្វាន់ តែជាការផ្សព្វផ្សាយភាពយន្ដ ដ៏មានប្រសិទ្ធិភាព ដើម្បីឲ្យបរទេសស្គាល់ពីកម្ពុជា។
នាងបន្តថា នៅក្នុងប្រទេសចិននាង និងប្រតិភូមហាហង្ស ទទួលបានការស្វាគមន៍យ៉ាងខ្លាំង ដោយក្រៅពីមានក្រុមការងារចិន ជូនទៅមកនាំផ្លូវគ្រប់ច្រកល្ហក ក្រឡេកទៅមើលលទ្ធផល នៃការពិពរ័ណ៌ភាពយន្តរឿង «ណូលីណូឡា» ដែលមហាហង្សទទួលបានសិទ្ធិតាំងបង្ហាញ ក៏មានការរៀបចំប្រូម៉ូតផ្សព្វផ្សាយពីភាគីចិន លើកមុខលើកមាត់ស្នាដៃរបស់កម្ពុជាណាស់ដែរ។
ដោយឡែកលោក អុិន សុភិន បានបញ្ជាក់បន្ថែមថា សម្រាប់សេរីភាពក្នុងការដើរកម្សាន្ត នៅពីក្រោយមហោស្រពភាពយន្តនោះ រូបលោក និងប្រតិភូ មិនសូវមានឱកាសដើរកម្សាន្តនោះទេ ដោយសារមានអ្នកទទួលជូនទៅជូនមក ហើយស្របពេលប្រទេសចិន អត់មានអុិនធឺណិតសម្រាប់ប្រើទូលំទូលាយ ពិបាកទំនាក់ទំនងគ្នាផង រឹតតែធ្វើអោយលោក និងក្រុមការងារ មិនហ៊ានដើរ។ លោកថា តាំងពីទៅដល់ចិន រហូតដល់ថ្ងៃត្រឡប់មកវិញ ប្រតិភូគ្រប់រូបសុទ្ធតែមានរថយន្តជូនទៅមក និងមានអ្នកបកប្រែនៅជាប់ម្នាក់ ដោយអ្នកនាំផ្លូវទាំងនោះ ដឹងតែពីជូនទៅកម្មវិធី ទៅកន្លែងបាយ និងទៅកន្លែងគេង អត់ព្រលែងអោយដើររហូតរហូតទេ ទើបទៅកម្មវិធីច្រើនថ្ងៃនៅចិន តែមិនសូវបានដើរ។
យ៉ាងណាមិញ រូបលោក និងតារាសម្ដែងដទៃទៀត ក៏ទទួលបានបទពិសោធន៍ច្រើនពីព្រឹត្តិការណ៍នេះ ជាពិសេសបន្ទាប់ពីសារព័ត៌មានប្រទេសចិន សុំធ្វើកិច្ចសម្ភាសន៍ ស្ដីពីស្ថានភាពភាពយន្តនៅក្នុងប្រទេសកម្ពុជា៕
