(ភ្នំពេញ)៖ តារាសម្តែងស្រី ដែលបច្ចុប្បន្នបានវិវឌ្ឍន៍ខ្លួនទៅជាតារាចម្រៀងដ៏ល្បីឈ្មោះកញ្ញា ឆោម ណារ៉ុង ហៅ ណាណៃ ថ្មីៗនេះបានចូលរួមជាតារាកិត្តិយសក្នុងកម្មវិធី «អាថ៌កំបាំងក្រៅឆាក របស់តារា» ទទួលបានការចាប់អារម្មណ៍ច្រើនពីសំណាក់អ្នកគាំទ្រ។ ទន្ទឹមគ្នានេះ កញ្ញាបានទម្លាយនូវប្រវត្តិជីវិតកម្សត់ ពេលចូលសិល្បៈដំបូងថា ត្រូវបានអ្នកសិល្បៈរៀមច្បងមើលងាយ មើលស្រាល និងជិះជាន់ ព្រោះនាងជាតារាចំណូលថ្មី។
តាមរយៈការសាកសួររបស់ពិធីករ-ពិធីការិនី ក្នុងកម្មវិធី «អាថ៌កំបាំងក្រៅឆាក របស់តារា» តារាសម្តែង និងជាតារាចម្រៀងស្រី ណាណៃ បានឲ្យដឹងថា ពេលនាងចូលសិល្បៈដំបូង គឺត្រឹមតែជាតារាសម្តែងប៉ុណ្ណោះ តែដោយសារចិត្តស្រឡាញ់សិល្បៈ និងចេះវិវឌ្ឍន៍ខ្លួនទើបបានក្លាយជាតារាចម្រៀង។ ប្រឡូកក្នុងវិស័យសម្តែង ណាណៃ ត្រូវបានផលិតករហៅទៅសម្តែងជាញឹកញាប់ផងដែរក្នុងនោះ នាងបានចូលសម្តែងក្នុងផលិតកម្មមហាហង្ស ផលិតកម្មហង្សមាស និងថតឲ្យទូរទស្សន៍បាយ័នជាដើម។
យ៉ាងណាមិញ តារាចម្រៀងម្ចាស់បទ «ព្រៃវែងរឿងខ្ញុំ» រូបនេះ បានទម្លាយនូវប្រវតិ្ត ពេលចូលសម្តែងដំបូងថា នាងបានឆ្លងកាត់នូវភាពលំបាកជាច្រើន ជាពិសេស គឺទទួលរងនូវការមើលងាយ រើសអើស និងជិះជាន់ពីសិល្បកររៀមច្បងតែម្តង។ ណាណៃ អះអាងថា ដោយសារខ្លួនជាតារាពន្លកថ្មី ពេលចូលសម្តែងដំបូង ត្រូវមនុស្សជាច្រើនរំខាន ពេលខ្លួនកំពុងសម្តែងធ្វើយ៉ាងណាឲ្យការងាររបស់នាងមិនអាចទៅមុខរួច។ ទោះបែបនេះ នាងនៅតែព្យាយាម រហូតទទួលបានតំណែងពីតួអង្គរាយរង ទៅជាតួអង្គធំក្នុងរឿង។
ទន្ទឹមគ្នានេះ ព្រោះតែមហិច្ឆតាក្នុងសិល្បៈ ឆោម ណារុង ហៅណាណៃ បានបន្តប្រឡូកក្នុងវិស័យចម្រៀងបន្ថែម ព្រោះត្រូវបានផលិតកម្ម Zone ផ្តល់ឱកាសឲ្យ និងចេញចម្រៀងជាបន្តបន្ទាប់ដូចជាបទ «ព្រៃវែងរឿងខ្ញុំ», បទ «ប្រាកដទេថាគេស្នេហ៍បងជាងអូន» និងបទ «ប្រុសសាវ៉ាចេញឲ្យឆ្ងាយ» ជាដើម ដែលបទទាំងនោះសុទ្ធសឹងតែមានការគាំទ្រច្រើនពីមហាជន។ នាងបញ្ជាក់ថា ទោះចេញចម្រៀងក្នុងផលិតកម្ម Zone តែនាងមិនទាន់ចុះកុងត្រាជាមួយផលិតកម្មឡើយ ព្រោះត្រូវទទួលសម្តែង និងទទួលច្រៀងតាមការប្រគំតន្រ្តីផ្សេងៗទៀត។ និយាយដល់ចំណុចនេះ ណាណៃ បានលើកម្រាមដៃដប ថ្លែងអំណរគុណដល់ម្ចាស់ផលិតកម្ម Zone ដែលបានផ្តល់ឱកាសឲ្យនាងចេញបទចម្រៀងក្នុងផលិតកម្ម និងបើកសិទ្ធសេរីភាពឲ្យនាងទទួលកម្មវិធីផ្សេងៗ ដើម្បីអភិវឌ្ឍន៍ខ្លួន។
ពាក់ព័ន្ធនឹងរឿងរ៉ាវផ្ទាល់ខ្លួនក្រៅពីសិល្បៈ កញ្ញា ណាណៃ បានបញ្ជក់ថា ខ្លួនមិនទាន់ទទួលស្នេហាថ្មីនោះឡើយ ចាប់តាំងពីទទួលរងគ្រោះដោយសាររឿងស្នេហ៍ម្តងហើយនោះ។ នាងបញ្ជាក់ថា កាលពី៤ឆ្នាំមុន មានបុរសម្នាក់ចូលមកក្នុងជីវិតនាង ធ្វើឲ្យនាងស្រឡាញ់ ផ្តល់សង្ឃឹមឲ្យនាង តែចុងក្រោយបែរជាទៅរៀបការជាមួយនារីផ្សេងទៅវិញ ជាហេតុធ្វើឲ្យនាងមិនទាន់ហ៊ានទទួលស្នេហ៍ថ្មីមកទល់នឹងបច្ចុប្បន្ន។ តាមរយៈការឈឺចាប់នេះ នាងក៏បានតែងចេញនូវបទចម្រៀងមួយដែរ គឺបទ «ប្រុសសាវ៉ាចេញឲ្យឆ្ងាយ»៕