(ភ្នំពេញ)៖ តារាចម្រៀងរ៉េប និងជាកវីនិពន្ធ គឺឌីជេ ក្លាំ ក្រោយពីបានប្រឡូកចូលក្នុងវិថីសិល្បៈរាប់ឆ្នាំ ទើបតែពេលនេះ លោកហាក់ទទួលបានការគាំទ្រ និងចាប់អារម្មណ៍ខ្លាំងពីសំណាក់ទស្សនិកជន តាមរយៈបទចម្រៀងដែលលោក បាននិពន្ធ មានដូចជាបទ «ចាក់កន្ទុយលេខជល់មាន់» និងបទ «អ្នករត់កង់បីស៊េរីថ្មី»។
ជាការពិត មួយរយៈចុងក្រោយនេះ បទ «ចាក់កន្ទុយលេខជល់មាន់» កំពុងតែមានការគាំទ្រច្រើន ពីបងប្អូនមហាជនគ្រប់ទិសទី។ តាមរយៈបទចម្រៀងដែលលោកបានបញ្ចេញជាច្រើន មានដូចជាបទ «ចាក់កន្ទុយលេខជល់មាន់», «អ្នករត់កង់បីស៊េរីថ្មី» និង «បទទឹកភ្នែកពលករ» ដែលបទទាំងអស់នេះ គឺសុទ្ធតែជាបទកំពុងពេញនិយម និងផ្ទុះខ្លាំង។
ដោយឡែក តារាចម្រៀងរ៉េប និងជាកវីនិពន្ធ មានដើមកំណើតមកពីខេត្តកណ្ដាលរូបនេះ ត្រូវបានទស្សនិកជនជាច្រើន ធ្វើការកោតសរសើរមិនដាច់ពីមាត់ថា មានអត្តចរិតស្លូតបូត រួសរាយរាក់ទាក់។ បើនិយាយពីទេពកោសល្យវិញ ឌីជេ ក្លាំ មានភាពប៉ិនប្រសព្វក្នុងការនិពន្ធបទចម្រៀង ប្រកបដោយមនោសញ្ចេតនា និងចាក់ដោតដល់អារម្មណ៍ទស្សនិកជន មិនថាបទបែបមនោសញ្ចេតនា ឬញាក់កន្រ្តាក់អារម្មណ៍នោះទេ។ ជាពិសេស បើទៅលើអត្ថន័យបទចម្រៀងនីមួយៗ ក៏ដូចជាការបកស្រាយ គឺមានទម្ងន់ និងពោរពេញទៅដោយទឹកដមពីរោះ។
គួរបញ្ជាក់ថា ឌីជេ ក្លាំ មានស្រុកកំណើតនៅឯភូមិបឹងកណ្តាល ឃុំខ្ពបអាទាវ ស្រុកលើកដែក ខេត្តកណ្តាល។ លោកគឺជាកូនទី៤ ក្នុងចំណោមបងប្អូន១០នាក់។ ឌីជេ ក្លាំ បានប្រឡូកចូលសិល្បៈ ជាច្រើនឆ្នាំមកហើយ តែហាក់គ្មានឱកាសបានល្បី ដូចតារាចម្រៀងដទៃនោះទេ ទើបតែមួយរយៈពេលចុងក្រោយនេះ ឌីជេ ក្លាំ ហាក់មានការគាំទ្រ និងមានទស្សនិកជនស្គាល់ច្រើន តាមរយៈបទចម្រៀងជាច្រើនបទរបស់លោក ដែលកំពុងចរាចរលើទីផ្សារសិល្បៈ ជាពិសេសគឺបទ «ចាក់កន្ទុយលេខជល់មាន់» និងបទ «អ្នករត់កង់បីស៊េរីថ្មី» គឺពេញនិយមខ្លាំង ពីស្រទាប់មហាជនតែម្ដង៕
