(ភ្នំពេញ)៖ តារាកូរ៉េស្រីកញ្ញា Sulli ដែលជាអតីតសមាជិកក្រុម Fx ត្រូវបានអ្នកគ្រប់គ្រង រកឃើញសាកសពរបស់នាងក្នុងផ្ទះ។ ដោយមូលហេតុនៃការស្លាប់ គឺត្រូវបានប៉ូលីសរាយការណ៍ថា ដោយការធ្វើអត្តឃាតខ្លួនឯង។ នេះបើយោងតាមការដកស្រង់ការផ្សាយចេញពីព័ត៌មាន Koreaboo ចេញផ្សាយនៅថ្ងៃទី១៤ ខែតុលា ឆ្នាំ២០១៩។
បើតាមមន្រ្តីប៉ូលីសនៅតំបន់ Seongnam Sujeong នៅថ្ងៃទី១៤នេះ បានឲ្យដឹងថា សាកសពរបស់តារាស្រី Sulli ត្រូវបានរកឃើញនៅក្នុងផ្ទះរបស់នាងក្នុងតំបន់ Sujeong-gu, Seongnam-si។ សាកសពរបស់នាងត្រូវបានរកឃើញ ដោយអ្នកគ្រប់គ្រងរបស់នាង នៅវេលាម៉ោង ៣៖២១ នាទីម៉ោងនៅកូរ៉េ។
យ៉ាងណាមិញ ចំពោះមូលហេតុនៃការស្លាប់របស់តារាកូរ៉េរូបនេះ ត្រូវបានប៉ូលីសអះអាងថា ដោយការធ្វើអត្តឃាតខ្លួនឯង ព្រោះ Sulli បានធ្លាក់ក្នុងជំងឺបាក់ទឹកចិត្តធ្ងន់ធ្ងរ។ តែយ៉ាងណា មិនមានព័ត៌មានអ្វីបន្ថែមពីក្រុមគ្រួសារ និងភ្នាក់ងាររបស់នាងគឺ SM Entertainment ឡើយ។
ប៉ូលីសបន្តថា Sulli ធ្វើអត្តឃាតខ្លួនឯង តាមរយៈការចងកសម្លាប់ខ្លួន ក្នុងផ្ទះរបស់នាងពីជាន់ទី២។
គួរជម្រាបថា Sulli គឺជាអតីតសមាជិកក្រុម Fx របស់ SM Entertainment កាលពីឆ្នាំ២០០៩។ តែយ៉ាងណា ក្នុងឆ្នាំ២០១៤ នាងបានចាកចេញពីក្រុមនេះ ដើម្បីមកធ្វើជាតារាសម្តែងវិញម្តង៕
