(ភ្នំពេញ)៖ គ្រួសារកវីស្ទឹងសង្កែលោក គង្គ ប៊ុនឈឿន បានផ្ទុះប្រតិកម្មភ្លាមៗ ឆ្លើយតបនឹងការមិនពេញចិត្ត បន្ទាប់ពីតារាចម្រៀង សោភា ទេព បានចេញបទចម្រៀងមួយមានចំណងជើង «ស្ពានអូតាគី» ជា Version ស្រី ដោយបានកែប៉ារ៉ូលពីបងមកអូន និងកែប៉ារ៉ូលពីកម្មកររថភ្លើងកម្សត់ មកជាកម្មកររោងចក្រកម្សត់វិញ ប៉ុន្តែតារាចម្រៀង សោភា ទេពី បានទទួលសុំទោសនឹងថា និងសុំកុំឲ្យគ្រួសារម្ចាស់បទ ចាប់ទោសអូសដំំណើរលើរូបនាងអី។
តារាចម្រៀងបែបស្រគត់ស្រគំ សោភា ទេពី បានថ្លែងបញ្ជាក់ថា ផ្អែកតាមប្រតិកម្មរបស់គ្រួសារលោក គង្គា ប៊ុនឈឿន អត់សប្បាយចិត្ត តែការកែពាក្យពី «កម្មកររថភ្លើងកម្សត់» ទៅជា «កម្មកររោងចក្រកម្សត់» ប៉ុណ្ណោះ ចំណែកការកែប៉ារ៉ូលពី «បង» មក «អូន» ក្នុងការ Cover បទ «ស្ពានអូតាគី» នោះ គឺមិនជាអ្វីទេ។ កញ្ញាថាហេតុផលនៃការកែប៉ារ៉ូលពីពាក្យរថភ្លើង មកជាពាក្យរោងចក្រវិញនោះ នាង និងអ្នកផលិតបទថ្មី មិនមានបំណងអាក្រក់ទេ គឺគ្រាន់តែចង់ឲ្យបទនោះ មានន័យឆ្លើយតបទៅនឹងបទប្រុស ហើយមកពីនារីកម្រប្រឡូកជាកម្មកររថភ្លើងណាស់ ទើបប្ដូរជាកម្មកររោងចក្រវិញ ដើម្បីឲ្យត្រូវនឹងបរិបទបទស្រីក្នុងសម័យនេះ។
ស្រីស្រស់ សោភា ទេពី បន្តថា ការបកស្រាយបទនេះ ជាបទស្រី មានហេតុផលតែមួយគត់ គឺចង់ឲ្យបទនេះ ស្រីអាចច្រៀងបាន ហើយក៏ចង់ពញ្ញាក់អារម្មណ៍ ឲ្យបន្តគាំទ្របទនេះ កុំឲ្យបាត់បង់។ នាង និងក្រុមផលិត មិនមានបំណងមាក់ងាយដល់ស្នាដៃរបស់លោក គង្គា ប៊ុនឈឿន ទេ ផ្ទុយទៅវិញ គឺបណ្ដាលមកពីនាងស្រឡាញ់បទនេះ ហើយចង់ Cover ឲ្យមានន័យជាបទស្រី ទើបប្ដូរពីពាក្យថា «កម្មកររថភ្លើង» មកជា «កម្មកររោងចក្រ»។ សោភា ទេពី ទទូចសុំការយោគយល់ និងសុំទោសដល់គ្រួសារម្ចាស់ស្នាដៃ ដោយនាងបញ្ជាក់ថា ការផ្លាស់ប្ដូរប៉ារ៉ូល ក៏ដើម្បីឲ្យក្លាយជាបទស្រីអាចបកស្រាយបានប៉ុណ្ណោះ។
ការឆ្លើយតបរបស់ សោភា ទេពី គឺបន្ទាប់ពីម្ចាស់អាក់ខោនហ្វេសប៊ុកឈ្មោះថា «គង្គ ប៊ុនឈឿន Kong Bunchhoeun» បានសរសេរបង្ហោះ កាលពីថ្ងៃទី១៣ ខែតុលានេះថា «បទស្ពានអូតាគីស្រី យកមកច្រៀង កែលំនាំខ្លះៗ បំណងប្រាថ្នារបស់អ្នកនិពន្ធ ដែលខិតខំបញ្ចេញពាក្យពេចន៍ ទំរាំបានទទួលស្នាដៃជិតកន្លះជិវិត ហេតុអីក៏បច្ចុបន្យនេះត្រូវគេរំលាយ ប្ដូរ យកទៅធ្វើទុន យ៉ាងចំអក ដែលបកមកឲ្យម្ចាស់ស្នាដៃវិញ ពួកអ្នកមើលងាយចុះ ព្រោះយាយខ្ញុំគ្មានសមត្ថភាពថែររក្សាបទនេះ សិទ្ធក៏មានហើយៗនឹងគឹតយ៉ាងណា លើកមុនគ្រាន់បានម៉ាផ្អើល រួចក៏ស្ងាត់ហួសទៅ ដោយមិនបានជួបមុខពួកគាត់ផង តើត្រង់ណាជាក្តីសង្ឃឹម? ចង់អង្វរថា ជួយផង! កុំឲ្យមនុស្សចាស់នេះមិនបានផល ហើយអស់លុយចុះឡើង ព្រោះតែរក្សាសិទ្ធិនេះ សង្ឃឹមលើបងប្អូនគាំទ្រ នឹងជួយរក្សា អរគុណរួមទាំងអស់គ្នា»៕