(សៀមរាប)៖ តារាចម្រៀងសម្រស់ផូរផង់ កញ្ញា ពេជ្រ សូលីកា បានបង្ហាញខ្លួនយ៉ាងកាលីប ក្នុងពិធីតាំងពិព័រណ៌គ្រឿងពេញ Chateau Des Gems នៅខេត្តសៀមរាប កាលពីល្ងាចថ្ងៃទី៥ តុលា ឆ្នាំ២០១៩ សណ្ឋាគារ Memoire Palace Resort and Spa។ ជាមួយនឹងការប្រគល់ជូនមន្ទីរពេទ្យកុមារអង្គរខេត្តសៀមរាប ចំនួន៥០លានរៀល ពីពិព័រណ៍មួយនេះ នាងក៏បានប្រកាសអំពាវនាវ ដល់សប្បុរសជន ដើម្បីជួយដល់មន្ទីរពេទ្យបន្តទៀតផងដែរ។
ជាមួយនឹងការបកស្រាយបទចម្រៀងច្រើនបទ អមដោយឈុតគ្រឿងពេជ្រ កញ្ញា ពេជ្រ សូលីកា បានបង្ហាញអារម្មណ៍សប្បាយរីករាយ ដែលកញ្ញាត្រូវបានជ្រើសជាតារាកិត្តិយសក្នុងពិព័រណ៌ដ៏ធំនេះ ក្រោមអធិបតីភាពលោកស្រី ទៀង អេង ទៀ សីហា ភរិយាអភិបាលខេត្តសៀមរាប។ កញ្ញាថា ជាលើកទី១ ដែលនាងបានច្រៀងក្នុងគម្រោងបំផុសអោយមហាជនបានដឹងពីការចូលរួមជួយដល់មន្ទីរពេទ្យកុមារអង្គរ ខណៈដែលការងារសប្បុរសធម៌កន្លងមក កញ្ញាបានចូលរួមច្រើនមកហើយ លើកលែងតែសកម្មភាពបំផុសអោយជួយដល់មន្ទីរពេទ្យកុមារអង្គរនេះ។ កញ្ញា ទទូចអោយមានការចូលរួមបរិច្ចាគជួយដល់មន្ទីរពេទ្យនេះអោយបានកាន់តែច្រើន បន្ទាប់ពីបានដឹងថា មន្ទីរពេទ្យកុមារអង្គរប្រឈមនឹងខ្វះខាតច្រើនមិនខុសពីមន្ទីរពេទ្យគន្ធបុប្ផា។ នាងថាពិតជាសប្បាយចិត្តណាស់ ដែលបានរួមចំណែកជួយបំផុសអោយមានការយកចិត្តទុកដាក់ជួយដល់មន្ទីរពេទ្យកុមារអង្គរ។ កញ្ញា ក៏នឹងត្រៀមខ្លួនបន្តបន្ទាប់ដើម្បីជួយបំផុសជួយដល់មន្ទីរពេទ្យនេះផងដែរ។
លោកស្រី ម៉ៅ ពោរពេញ អគ្គនាយិកាហាងពេជ្រ Chateau Des Gems បានថ្លែងបញ្ជាក់ថា នេះជាលើកទី១ហើយ ដែលហាងពេជ្ររបស់អ្នកស្រីប្រគល់អំណោយចំនួន៥០លានរៀលជូនដល់មន្ទីរពេទ្យកុមារអង្គរខេត្តសៀមរាប បន្ទាប់ពីកត់សម្គាល់ថា មន្ទីរពេទ្យនេះប្រឈមនឹងការខ្វះខាត។ អ្នកស្រីថាការប្រគល់ថវិកានេះ ត្រូវបានធ្វើឡើងក្នុងពិធីតាំងពិព័រណ៌លើកទី១របស់ហាងពេជ្រ Chateau Des Gems នៅលើទឹកដីខេត្តសៀមរាប បន្ទាប់ពីហាងពេជ្រនេះឈរជើងនៅផ្សារ Icon Siam ក្នុងប្រទេសថៃ និងនៅភ្នំពេញយ៉ាងជោគជ័យ។ នៅក្នុងពិធីនោះ លោកស្រីក៏ទទូចអោយសប្បុរសជនបន្តធ្វើសប្បុរសធម៌ ជួយដល់មន្ទីរពេទ្យកុមារអង្គរអោយបានកាន់តែច្រើនបន្ថែមទៀតផងដែរ។
លោកស្រីបន្តថា ពិធីតាំងពិព័រណ៌របស់ហាងពេជ្រ Chateau Des Gems មិនត្រឹមតែបង្ហាញពីសន្ទុះរីកចំរើននៃទីផ្សារពេជ្រនៅកម្ពុជា តែក៏ជាជំនួបរបស់អតិថិជន ដើម្បីចូលរួមចំណែកជាជំនួយសប្បុរសធម៌ជួយដល់សង្គម ជាពិសេសគឺមន្ទីរពេទ្យកុមារអង្គរជាឧទាហរណ៍។ ពិធីនេះធ្វើឡើង២ថ្ងៃនៅខេត្តសៀមរាប ដោយកាលពីថ្ងៃទី៥ តុលា ដែលមានការគ្រងឈុតពេជ្រដោយតារាចម្រៀងស្រស់ស្អាត កញ្ញា ពេជ្រ សូលីកា តារាចម្រៀងរបស់ហង្សមាស និងនៅថ្ងៃទី៦ តុលា ដោយមានវត្តមានតារាថៃល្បីល្បាញគឺលោក Dome Pakorn Lam។ នៅថ្ងៃទី១២ និងទី១៣ តុលា ខាងមុខ Chateau Des Gems ក៏នឹងមានការរៀបចំពិព័រណ៌ និងការជួបជុំអតិថិជនទ្រង់ទ្រាយធំបែបនេះ នៅរាជធានីភ្នំពេញ នៅភោជនីយដ្ឋាន Topaz ផងដែរ។
អ្នកស្រី ប្រាក់ ម៉ានីឡា ប្រធានការិយាល័យសុខភាពកុមារសកលនៃមន្ទីរពេទ្យកុមារអង្គរ សម្ដែងអារម្មណ៍ត្រេកអរយ៉ាងខ្លាំង ដែលម្ចាស់ពេជ្រ Chateau Des Gems ប្រគល់ជូនថវិកាចំនួន៥០លានរៀល ក្នុងពិធីតាំងពិព័រណ៌ទ្រង់ទ្រាយធំ ដែលធ្វើអោយមន្ទីរពេទ្យកុមារអង្គរទទួលបានថវិកាបរិច្ចាគមួយចំនួនផ្សេងទៀត ពីភ្ញៀវកិត្តិយសចូលរួមផ្សេងទៀត។ អ្នកស្រីថា មន្ទីរពេទ្យកុមារអង្គរមានតម្រូវការក្នុងមួយឆ្នាំ៦លានកន្លះសហរដ្ឋអាមេរិក ខណៈដែលក្នុងមួយថ្ងៃមានកុមារកម្ពុជាមកពីគ្រប់ខេត្តក្រុងចន្លោះពី៦០០ទៅ៧០០ អោយសម្រាកព្យាបាល។ អ្នកស្រីថាវប្បធម៌នៃការចែករំលែកនេះ នឹងកាន់តែមានតម្លៃនៅក្នុងសង្គមកម្ពុជា ជាពិសេសម្រាប់ន្ទីរពេទ្យកុមារអង្គរដែលកំពុងខ្វះខាតជំនួយ៕
