(ភ្នំពេញ)៖ តារាចម្រៀងល្បីឈ្មោះ ប៊ុត សីហា បានបាត់មុខពីវិស័យសិល្បៈ អស់រយៈពេលជាច្រើនខែមកហើយ ថ្មីៗនេះ តារាចម្រៀងធ្លាប់រងនូវរឿងអាស្រូវជាច្រើន លោក ប៊ុត សីហា បានបញ្ចេញនូវបទចម្រៀងថ្មី មានចំណងជើង «គុណគ្រូ» មុនថ្ងៃទិវាគ្រូបង្រៀង០៥តុលាមកដល់ ដោយត្រូវបានបញ្ចេញជាមួយនឹងអត្ថន័យចាក់ចំបេះដូងអ្នកគាំទ្រ ពិសេសឲ្យនឹករលឹកដល់គ្រូ ដែលធ្លាប់ផ្តល់ចំណេះដឹង។
ជាការពិត រៀងរាល់ថ្ងៃទី០៥ ខែតុលា រាជរដ្ឋាភិបាលកម្ពុជា ពិសេសក្រសួងអប់រំ បានបំផុសឲ្យមានទិវាជាតិ «គ្រូបង្រៀន» ក្រោមប្រធានបទដ៏មានអត្ថន័យ។ ស្របគ្នានេះដែរ អតីតម្ចាស់ពាន The Voice Cambodia រដូវកាលទី១ លោក ប៊ុត សីហា ក៏បានបង្ហើរសំនៀងដ៏ពីរោះ អមដោយខ្លឹមសារអត្ថន័យស៊ីជម្រៅ ដែលឆ្លុះបញ្ចាំងពីអារម្មណ៍គោរពស្រឡាញ់គ្រូបង្រៀន បានធ្លាប់បានដើរតួនាទីជាមាតាបិតា ឬជាអ្នកអាណាព្យាបាលទី២របស់សិស្ស ដោយគ្មានការរើសអើង និងមិនប្រកាន់ពូជសាសន៍។
សូមបញ្ជាក់ថា ទិវាគ្រូបង្រៀនកម្ពុជា ត្រូវបានផ្តួចផ្តើមបង្កើតដោយសម្តេចតេជោ ហ៊ុន សែន កាលពីថ្ងៃទី៣ ខែកញ្ញា ឆ្នាំ១៩៩៧ ដោយកំណត់យកថ្ងៃទី០៥ ខែតុលា រៀងរាល់ឆ្នាំ ដើម្បីប្រារព្ធទិវានេះ គឺមានគោលបំណងបំផុសឡើងវិញនូវវប្បធម៌ និងប្រពៃណីនៃការរំលឹកគុណូបការៈ ដ៏ថ្លៃថ្លារបស់សិស្ស ចំពោះគ្រូបង្រៀននៅទូទាំងប្រទេស។ គិតរហូតដល់ពេលនេះ មានរយៈពេលជាង២០ឆ្នាំមកហើយ៕