(ភ្នំពេញ)៖ នាយ សាន ម៉ៅ ត្រូវបានទស្សនិកជនដឹងថា ជាសិល្បករមួយរូប ដែលមានប្រជាប្រិយភាព និងមានការគាំទ្រច្រើន ពីសំណាក់ទស្សនិកជនគ្រប់ស្រទាប់វណ្ណៈ តាមរយៈជំនាញខាងសិល្បៈ ផ្នែកល្ខោន និងកំប្លែងជាច្រើនឆ្នាំមកហើយនោះ។ យ៉ាងណាមិញ កាលពីល្ងាចថ្ងៃទី០២ ខែតុលា ម្សិលមិញនេះ នាយ បានទទួលមរណភាពហើយ ដោយសារជំងឺបៀតបៀនជាច្រើនមុខ។ ដំណឹងមរណភាពរបស់ តារាកំប្លែង នាយ សាន ម៉ៅ បានធ្វើឲ្យមហាជន និងសិល្បករ-សិក្បការិនី ទូទាំងប្រទេសតក់ស្លុត និងសម្តែងនូវការសោកស្តាយគ្រប់គ្នា ចំពោះការបាត់បង់តារាកំប្លែងជើងចាស់រូបនេះ ខណៈសពត្រូវបានដឹកមកពីប្រទេសថៃ ដល់ប្រទេសកម្ពុជា នាយប់មិញនេះ និងកំពុងតម្កល់ធ្វើបុណ្យនៅក្នុងបរិវេណវត្តព្រែកប្រា សង្កាត់ព្រែកថ្មី ខណ្ឌច្បារអំពៅ។
ជាការកត់សម្គាល់ បន្ទាប់ពីទទួលបានដំណឹងមរណភាពរបស់តារាកំប្លែង នាយ សាន ម៉ៅ មានសាររំលែកទុក្ខជាច្រើនពីសំណាក់ទស្សនិកជន និងសិល្បករ-សិក្បការី បានលេចឡើងជាបន្តបន្ទាប់ ព្រោះការបាត់បង់នាយ សាន ម៉ៅ ជាការបាត់បង់នូវតារាកំប្លែងជើងចាស់មួយរូប បន្ទាប់ពីតារាកំប្លែង នាយ វីតាមីនសេ។ តារាល្បីៗ ដែលបានចូលរួមរំលែកទុក្ខ និងបង្ហាញការកត់ស្លុតចំពោះការបាត់បង់ នាយ សាន ម៉ៅ មានដូចជា អ្នកនាង ចន ច័ន្ទលក្ខិណា ប្រធានសមាគមសិល្បករខ្មែរ, កញ្ញា ដួង ហ្សូរីដា, កញ្ញា ទឹម រដ្ឋា, ពិធីករល្បីឈ្មោះ លោក ជា វិបុល, អ្នកនាង ខាត់ សុឃីម, លោក សាវិន ហ្វីលីព, អ្នកនាង សារាយ សក្ខណា, កញ្ញា ដេននី ក្វាន, កញ្ញា ចាន់ នីកា ព្រមទាំងសិល្បករ-សិល្បការិនីជាច្រើនទៀត។
ប៉ុន្មានឆ្នាំចុងក្រោយនេះតារាកំប្លែង នាយ សាន ម៉ៅ ហាក់បាត់មុខមាត់ពីវិស័យសិល្បៈ មិនឃើញឡើងសម្តែងលើកញ្ចក់ទូរទស្សន៍ ដូចសព្វមួយដងឡើយ ដោយសារតែមានជំងឺជាប់កាយ ត្រូវព្យាបាលជាបន្តបន្ទាប់។ ជាមួយគ្នានេះ ក៏មានសប្បុរសជនជាច្រើន បានចូលរួមឧបត្ថមចេញថ្លៃព្យាបាល ដល់នាយ សាន ម៉ៅ នៅមន្ទីពេទ្រប្រទេសថៃ។ តែយ៉ាងណា នៅតែមិនអាចស្រោចស្រង់ជីវិតលោកបាន ទោះបីជាមានសប្បុរសជនជួយជ្រោមជ្រែងច្រើន និងមានការខិតខំយកចិត្តទុកដាក់ពីក្រុមគ្រូពេទ្យក្តី។
បើតាមក្រុមគ្រួសារនាយ សាន ម៉ៅ ធ្លាប់បាននិយាយថា នាយ សាន ម៉ៅ មានជំងឺជាប់កាយជាច្រើនក្នុងនោះមានដូចជា ជំងឺខ្សោយបេះដូង, ទឹកនោមផ្អែម, លើសឈាម, រលាកសួត, និងដុះសាច់ផ្លូវដង្ហើម។
គួរជម្រាបថា នាយ សាន ម៉ៅ តារាកំប្លែងដ៏ល្បីមួយរូបរបស់កម្ពុជា បានទទួលមរណភាព នៅម៉ោង០៦ល្ងាច ថ្ងៃទី០២ ខែតុលា ឆ្នាំ២០១៩ នៅឯមន្ទីរពេទ្យប្រទេសថៃ។ បច្ចុប្បន្នសពរបស់លោក ត្រូវបានក្រុមគ្រួសាររៀបចំធ្វើបុណ្យតាមប្រពៃណីសាសនា នៅវត្តព្រែកប្រា សង្កាត់ព្រែកថ្មី ខណ្ឌច្បារអំពៅ រាជធានីភ្នំពេញ៕