(ភ្នំពេញ)៖ តារាចម្រៀងសំឡេងក្រអួនក្រអៅ មានទឹកដមនៅក្នុងផលិតកម្ម Zone កញ្ញា ណាណៃ មួយរយៈចុងក្រោយនេះ គេសង្កេតឃើញនាងកាន់តែទទួលបាន នូវប្រជាប្រិយភាពខ្លាំង ខណៈដែលបទចម្រៀងនីមួយៗ ដែលនាងបានបញ្ចេញ សុទ្ធសឹងតែទទួលបាននូវការចាប់អារម្មណ៍ ពីសំណាក់ទស្សនិកជន។ យ៉ាងណាមិញ ក្រោយពិធីបុណ្យភ្ជុំបិណ្ឌ ប្រពៃណីជាតិខ្មែរ បានកន្លងផុតទៅភ្លាម ស្រាប់តែស្រីស្អាត ណាណៃ មិនបង្អង់យូរ ក៏បានបញ្ចេញនូវបទចម្រៀង មួយបទមានចំណងជើងថា «ប្រុសសាវ៉ាចេញឲ្យឆ្ងាយ» ដែលជាបទញាក់កន្រ្តាក់អារម្មណ៍ ខណៈដែលអត្ថន័យវិញ ពិតជាចាក់ដោតអារម្មណ៍ ប្រុសៗដែលជាព្រាននារីទៀតផង ជាពិសេសកំពុងទទួលបានការចាប់អារម្មណ៍ខ្លាំង ពីទស្សនិកជន។
ពិតជាប្លែកអារម្មណ៍ជាមួយនឹងបទថ្មី ដែលទើបនឹងបញ្ចេញក្ដៅៗ ពីតារាចម្រៀងទឹកមុខមានមន្តស្នេហ៍ កញ្ញា ណាណៃ ខណៈដែលសព្វមួយដង គេធ្លាប់តែឃើញ តារាស្រីរូបនេះមានតែបទចម្រៀង បែបមនោសញ្ចេតនា រៀបរាប់ពីស្នេហា និងការបែកបាក់គ្រួសារជាដើម។ ដោយឡែកសម្រាប់បទថ្មី មានចំណងជើងថា «ប្រុសសាវ៉ាចេញឲ្យឆ្ងាយ» ពីកញ្ញា ណាណៃ គឺជាបទចម្រៀងបែបញាក់កន្រ្តាក់អារម្មណ៍ លាយឡំនិងអត្ថន័យ ឌឺដងផ្លែផ្កាទៅកាន់ប្រុសៗ ដែលជាព្រាននារី ឬចង់មកញ៉ែហ្វ្រីៗតែម្ដង។
ជាមួយគ្នានេះ បទ «ប្រុសសាវ៉ាចេញឲ្យឆ្ងាយ» របស់ណាណៃ ក៏បង្ហាញឲ្យឃើញ ពីភាពក្លាហាន និងភាពរឹងមាំរបស់នារី ទោះបីជានៅម្នាក់ឯងក៏សប្បាយ គ្រាន់បើជាងយកប្រុសសាវ៉ា មកធ្វើជាសង្សារ នេះជាអត្ថន័យខ្លះៗក្នុងចម្រៀងមួយបទនេះ ជឿជាក់ថា ទស្សនិកជនស្ដាប់ហើយពិតជាពេញចិត្ត។
ចង់ដឹងកាន់តែច្បាស់ថា បទចម្រៀង «ប្រុសសាវ៉ាចេញឲ្យឆ្ងាយ» មានអត្ថន័យ និងពីរោះយ៉ាងណានោះ សូមប្រិយមិត្តទស្សនិកជន រីករាយសណ្ដាប់កម្សាន្តទាំងអស់គ្នា៖