(ភ្នំពេញ)៖ រយៈពេលជិតមួយខែទៀតប៉ុណ្ណោះ ពិធីបុណ្យភ្ជុំបិណ្ឌ ដែលជាពិធីបុណ្យសាសនាដ៏ធំនឹងចូលមកដល់ ដោយក្នុងនោះក៏មានបណ្តាផលិតកម្មនានា កំពុងដុតដៃដុតជើង ផលិតបទចម្រៀង សម្រាប់រាំលេងកំសាន្តពេលឈប់សម្រាកក្នុងថ្ងៃភ្ជុំបិណ្ឌនោះផងដែរ។ ជាក់ស្តែង ពេលនេះតារាសម្តែង និងតារាចម្រៀងរបស់ផលិតកម្មថោនជាច្រើន បានរួមដៃគ្នាថត MV ចម្រៀងប្រពៃណីខ្មែរ ដោយមើលទៅម្នាក់ៗពិតជាសប្បាយរីករាយ និងខំប្រឹងប្រែងថតយ៉ាងខ្លាំង។
វត្តមានតារាចូលរួមគេឃើញមាន ខេម, សុន ស្រីពេជ្រ, រ៉ូលីន, កាតុ, លោក គន់ រៀមរតនៈ ហៅចែរ៉ូហ្សា, យ៉ែម ស្រីពេជ្រ ព្រមទាំងតារាប្រុសល្បីមួយចំនួនទៀត។ កាន់តែពិសេសជាងនេះ គ្រប់តារាប្រុសស្រីទាំងអស់ សុទ្ធតែបង្ហាញពីទឹកមុខសប្បាយរីករាយ ពេលមានឱកាសត្រូវបានផលិតកម្មថោន ផ្តល់ឱកាសឲ្យ ក្នុងការបង្ហាញមុខតាមរយៈចម្រៀងថ្មី។
ទស្សនិកជនដែលបានឃើញនូវរូបភាពក្រៅឆាក របស់តារាប្រុសស្រីដែលកំពុងថត MV ហើយនោះ ក៏បានបង្ហាញក្តីរំពឹងថា នឹងបានស្តាប់នូវចម្រៀងពីរោះៗរបស់ផលិតកម្ម ថោន និងរាំលេងកំសាន្តសប្បាយ ក្នុងឱកាសឈប់សម្រាក នៅថ្ងៃភ្ជុំបិណ្ឌខាងមុខនេះ៕