(ភ្នំពេញ)៖ គម្រោងចេញទៅច្រៀង និងសម្ដែងនៅលើទឹកដីនៃប្រទេសកូរ៉េ តាមរយៈក្រុមការងារផលិតកម្ម Galaxy ត្រូវបានគេទម្លាយថា សម្រាប់តារាចម្រៀងស្រី សំឡេងស្រួយកញ្ញា អ៊ីវ៉ា ហាក់បង្ហាញអារម្មណ៍ស្ទាក់ស្ទើរ និងអល់អែក នៅក្នុងការបង្ហាញវត្តមានលើកនេះ ព្រោះតែគ្មានឪពុកទៅជាមួយដូចរាល់ដង។ ជាការពិតណាស់ សម្រាប់តារាចម្រៀង ឃីន ស្រីនាថ ហៅអ៊ីវ៉ា បានបោះចោលលុយធំៗ នៅក្រៅស្រុកដល់ទៅជិត១០ប្រទេសឯណោះ ព្រោះតែនាងមិនហ៊ានចេញទៅច្រៀងម្នាក់ឯង ក្នុងនោះមានដូចជា អាមេរិក, បារាំង, កាណាដា, កូរ៉េ, ថៃ និងចិន ជាដើម ដែលខាង Sponsor ទាំងនោះធ្លាប់ទាក់ទងមក តែនាងតែងបានច្រានចោលជានិច្ច។
យ៉ាងណាមិញ គម្រោងចេញទៅច្រៀងសម្តែង នៅក្រៅស្រុកជាលើកដំបូង របស់តារា អ៊ីវ៉ា គឺជ្រើសរើសយកប្រទេសកូរ៉េខាងត្បូង។ សម្រាប់ការច្រៀងក្រៅប្រទេសនោះ អ៊ីវ៉ា នៅតែបង្ហាញអារម្មណ៍បែបស្ទាក់ស្ទើរ ក្នុងចិត្តហើយនាងថា មិនទាន់ប្រាកដទៅវិញ បើទោះជាអ្នកដឹកនាំកម្មវិធីប្រគំតន្ត្រី បានអះអាងថា នាងប្រាកដជានឹងចូលរួមក៏ដោយ។ អ៊ីវ៉ា ធ្លាប់បញ្ជាក់ថា នាងនឹងមិនចេញទៅច្រៀងសម្តែង នៅក្រៅស្រុកជាដាច់ខាត ប្រសិនបើគ្មានឪពុករបស់នាង គឺលោក អ៊ូ វ៉ាវ ហៅអ៊ូ ចន្ថា ចូលរួមជាមួយ។
ការដែលតារាចម្រៀង អ៊ីវ៉ា តាំងចិត្តបែបនេះ ដោយសារ អ៊ីវ៉ា ថាមិនមែនខ្លាចមានប្រុសតាមញ៉ែតាមរំខាននោះទេ តែនេះគឺជាទម្លាប់ ព្រោះតាំងពីតូចមក នាងមិនដែលចេញទៅណា ដោយគ្មានឪពុកម្តាយរបស់នាងទៅជាមួយឡើយ។ នាងបដិសេធចេញទៅច្រៀង នៅក្រៅស្រុកដល់ទៅជិត១០ប្រទេសនោះ ព្រោះខាង Sponsor ទាំងនោះ ចង់បានតែនាងម្នាក់ឯង តែនាងទាមទារ ឲ្យគេធានាប៉ារបស់នាងទៅជាមួយដែរ តែគេមិនព្រមទើបនាងមិនទៅ។
ដោយឡែក នៅដើមខែកញ្ញា ឆ្នាំ២០១៩នេះ មានការផ្សព្វផ្សាយពីក្រុមការងារផលិតកម្ម Galaxy ដែលអះអាងថា តារាចម្រៀងអ៊ីវ៉ា នឹងទៅច្រៀងសម្តែងនៅប្រទេសកូរ៉េខាងត្បូង រយៈពេលខ្លីជាមួយតារាចម្រៀង ខេម, គូម៉ា, Tempo Tris, វ៉ាន់ដា, Mr Oun, កំពូលតារាចម្រៀង ព្រាប សុវត្ថិ និងកូនប្រុសទាំង៣ រួមទាំងក្រុមភ្លេងចចកសមុទ្រផងដែរ។ តាមរយៈការបញ្ជាក់បែបនេះបង្ហាញថា អ៊ីវ៉ា បានប្តូរចិត្តពីការចោលទីផ្សារចម្រៀងក្នុងស្រុក ដោយទៅរកលុយនៅក្រៅស្រុក ដូចតារាផ្សេងៗទៀតដែរហើយ។
អ៊ីវ៉ា បញ្ជាក់ថា បើខាង Sponsor ព្រមធានាប៉ារបស់នាងទៅដែរ នាងនឹងចេញទៅច្រៀងហើយ គឺមិនមែនចេញទៅក្រៅស្រុក ព្រោះមិនហ៊ានជិះយន្តហោះទេ រឿងតែមួយគត់ គឺត្រូវយកប៉ាទៅជាមួយដែរ៕
