(ភ្នំពេញ)៖ ចំណងស្នេហ៍រាប់ឆ្នាំ ដែលមហាជនតែងតែនឹកស្មានមិនដល់ រវាងអ្នកនាង ស៊ឹម សូលីកា និងលោក អេង រិទ្ធី បានបង្ហាញចេញជារូបរាងហើយ ខណៈពួកគេកំពុងត្រៀមដឹកដៃគ្នា ចូលរោងការបំបាត់ពាក្យរអេចរអូចទាំងឡាយ នៅថ្ងៃទី០៩ ខែកញ្ញា ឆ្នាំ២០១៩នេះ។ ប៉ុន្តែអ្វីដែលទស្សនិកជន កត់សម្គាល់ឃើញមួយទៀត គឺពួកគេបែរជារៀបមង្គលការ ក្នុងរដូវចូលព្រះវស្សាទៅវិញ ដែលចាស់ទុំពីបុរាណបានហាមប្រាម មិនឲ្យមានពិធីរៀបការ ឬពិធីមង្គលអ្វីកើតឡើង ក្នុងរដូវនេះឡើយ។
យោងតាមគណនីហ្វេសប៊ុក របស់ពិធីការិនីមានឥទ្ធិពលជាងគេ នៅទូរទស្សន៍បាយ័ន អ្នកនាង ស៊ឹម សូលីកា បានបង្ហោះប្រយោគយ៉ាងខ្លីថា «Bride ០៩.០៩.២០១៩»។ ក្នុងនោះក៏បានបង្ហាញនូវ រ៉ូបអាពាហ៍ពិពាហ៍ពណ៌ស យ៉ាងស្រស់ស្អាតនៅលើគណនីហ្វេសប៊ុកផ្លូវការរបស់ខ្លួន ដែលមានន័យថា ទីបំផុតអ្នកនាងបានត្រៀមខ្លួនធ្វើជាកូនក្រមុំរួចរាល់ហើយ ពោលគឺពិធីរៀបការរវាងអ្នកនាង និងប្ដី នឹងប្រារព្ធធ្វើឡើង។
យ៉ាងណាមិញ ដំណឹងរៀបមង្គលការដ៏គួរឲ្យភ្ញាក់ផ្អើលនេះ បានក្លាយទៅជាការតាមដានយ៉ាងយកចិត្តទុកដាក់ ពីសំណាក់ទស្សនិកជន ដែលចូលចិត្តចង់ដឹងពីជីវិតឯកជនតារាប្រុសស្រីជើងចាស់ទាំងពីរ ដែលបានបង្កាត់ភ្លើងស្នេហ៍ផ្អែមល្ហែម ធ្វើឲ្យអ្នកគាំទ្រនឹកស្មានមិនដល់ ដោយសារតែអ្នកទាំងពីរធ្វើការរួមគ្នាជាដៃគូច្រើនឆ្នាំ បែរជាក្លាយពីមិត្តភាពទៅជាស្នេហា។ ភាពទាក់ទាញរបស់គូស្នេហ៍នេះ បានកើតឡើង ក្រោយពេលគេឃើញ ស៊ឹម សូលីកា បង្ហោះពាក្យពេចន៍មួយចំនួនឲ្យគេឯងកត់សម្គាល់ និងខ្លះបានសម្តែងនូវការអបអរចំណងស្នេហ៍រឹងមាំចាក់ឫសឈានដល់មង្គលការ។
ទោះជាយ៉ាងណាក្តីលោក អេង រិទ្ធី បានក្លាយជាបុរសមានសំណាងធំ ដែលបានចូលមកកាន់ជីវិត ស៊ឹម សូលីកា ធ្វើឲ្យចេញនូវសញ្ញាណល្អៗពេញចិត្តពេញថ្លើម ទាំងអ្នកនាងផ្ទាល់ក៏ដូចជា កូនស្រី ក៏ពេញចិត្ត និងមានការបើកចិត្តទទួលយកលោក អេង រិទ្ធី មកគ្រប់គ្រងអ្នកម្តាយពេញទំហឹងផងដែរ៕