(ភ្នំពេញ)៖ កូនប្រុសទីពីររបស់កំពូលតារាចម្រៀង លំដាប់ប្រទេសលោក ព្រាប សុវត្ថិ គឺលោក សុវត្ថិ មុន្នីនាគ បានបង្ហាញអារម្មណ៍រំភើប ក្រោយទទួលបានរថយន្តប្រណិតមួយគ្រឿង ដែលមានតម្លៃដល់ទៅជាង២០ម៉ឺនដុល្លារ ពីលោកឪពុក កំឡុងពេលចេញទៅសម្ដែងនៅឯក្រៅប្រទេស គឺសហរដ្ឋអាមេរិក ជាទឹកដីរបស់លោក ដូណាល់ ត្រាំ។
ជាការពិតណាស់ ថ្មីៗនេះនៅលើទំព័រហ្វេសប៊ុក របស់តារាចម្រៀងវ័យក្មេង សុវត្ថិ មុន្នីនាគ បានបង្ហាញនូវរថយន្តដ៏ប្រណិតរបស់ខ្លួន ម៉ាក «DODGE challenger srt demon 2018» ព្រមជាមួយនឹងសារថា «សំណព្វចិត្តបានមកដល់ហើយបាទ! ចំថ្ងៃពិសេស សែនក្បាលទឹក»។ យ៉ាងណាមិញ រថយន្តដ៏ថ្មីសន្លាងដែលយកចេញដោយ ផ្ទាល់ពីរោងចក្រ នៅសហរដ្ឋអាមេរិកនេះរបស់ សុវត្ថិ មុន្នីនាគ ត្រូវបានគេដឹងថា ជាកាដូរដែលទទួលបានពីលោកឪពុក បានទិញឲ្យ ក្នុងពេលដែលទៅសម្ដែង នៅឯសហរដ្ឋអាមេរិកកាលពីមុនពេលបុណ្យចូលឆ្នាំ។
គិតមកដល់ពេលនេះ មានរយៈពេលប្រមាណជិត៥ខែ ទើបរថយន្តប្រណិតពេញនិយមសម្រាប់យុវវ័យមួយនេះរបស់ សុវត្ថិ មុន្នីនាគ បានដឹកមកដល់ប្រទេសកម្ពុជា គឺចំថ្ងៃសែនក្បាលទឹកតែម្ដង។
គួរបញ្ជាក់ថា សុវត្ថិ មុន្នីនាគ គឺកូនប្រុសទីពីរ របស់កំពូលតារាចម្រៀង លោកព្រាប សុវត្ថិ ដែលបានក្លាយជាតារាចម្រៀង ប្រចាំផលិតកម្មរស្មីហង្សមាស រយៈពេលប្រមាណជាងមួយឆ្នាំមកហើយ ដោយបានចេញនូវបទចម្រៀងជាច្រើនបទ មានទាំងបទមនោសញ្ចេតនា និងញាក់កន្រ្តាក់អារម្មណ៍ ហើយក៏សុទ្ធសឹងតែទទួលបានការគាំទ្រពីទស្សនិកជន ពិសេសយុវវ័យ ។
ដោយឡែក សម្រាប់ការចេញទៅសម្ដែងនៅសហរដ្ឋអាមេរិក រយៈពេលជាង៣ខែមកនេះ គឺសុវត្ថិ មុន្នីនាគ បានចេញទៅសម្ដែងជាមួយនឹងលោក ព្រាប សុវត្ថិ និងបងប្អូនប្រុសលោកពីរនាក់ទៀត គឺសុវត្ថិ មុន្នីវណ្ណ និងសុវត្ថិ សិរីវុឌ្ឍ ដោយទទួលបានការអញ្ជើញ និងធានាពីសំណាក់ លោក ហង្ស ឈា ដែលជាអតីតតារាសម្ដែងជើងចាស់ដ៏ល្បីមួយរូប ប្រចាំប្រទេសកម្ពុជាផងដែរ៕