(ភ្នំពេញ)៖ ប៉ុន្មានម៉ោងមុននេះមានការចែករំលែកពេញបណ្តាញសង្គម នូវដំណឹងរបស់តារាចម្រៀងជើងចាស់ដ៏ល្បីល្បាញមួយរូប នាទសវត្សឆ្នាំ៦០ គឺអ្នកម្នាង សៀងឌី។ ក្នុងនោះមានការបញ្ជាក់ថា អតីតតារាចម្រៀងរូបនេះ កំពុងស្ថិតក្នុងមន្ទីពេទ្រសង្គ្រោះបន្ទាន់នៅសហរដ្ឋអាមេរិក បន្ទាប់ពីបានដួលបោកក្បាលធ្ងន់ធ្ងរ។
ជាក់ស្តែង បើយោងតាមផេកហ្វេសប៊ុករបស់ក្រុមព្រះសុរិយា បានបង្ហោះរូបភាពអតីតតារាចម្រៀង អ្នកម្នាង សៀងឌី អំឡុងពេលស្ថិតក្នុងមន្ទីពេទ្រ ភ្ជាប់ជាមួយនឹងសារថា៖ «ក្រុមព្រះសុរិយាទាំងមូល សូមបួងសួងដល់វត្ថុសក្តិសិទ្ធិនានា នៅលើលោក និងព្រះបារមីអតីតព្រះមហាក្សត្រ ព្រះមហាក្សត្រីយានីគ្រប់ជំនាន់ ជួយឲ្យអ្នកម្នាង ស៊ីសុវត្ថិ សៀងឌី រួចផុតពីគ្រោះចង្រៃនេះផង។ នៅពេលនេះ អ្នកម្នាងកំពុងស្ថិតក្នុងការសង្គ្រោះបន្ទាន់ នៅមន្ទីរពេទ្យមួយ នាសហរដ្ឋអាមេរិក ក្រោយពីអ្នកម្នាងដួលត្រូវក្បាលនាព្រឹកមិញនេះម៉ោងនៅប្រទេសកម្ពុជា។ អ្នកម្នាង ស៊ីសុវត្ថិ សៀងឌី ជាអ្នកចម្រៀងដ៏ល្បីល្បាញ នៃវង់តន្រ្តីយោធាភិរម្យ និងសុរាគារខ្មែរ នាទសវត្សឆ្នាំ៦០សម័យសង្គមរាស្រ្តនិយម»។
ទន្ទឹមគ្នានេះងាកមកហ្វេសប៊ុកមួយឈ្មោះ Ah Da ក៏បានបង្ហោះសារដែរថា «នាងខ្ញុំ និងអ្នកបង ស្រី សុធារី ព្រមទាំងអ្នកជិតខាងផ្សេងទៀតមកមើលអ្នកម្នាងមីង ស៊ីសុវត្ថ សៀង ឌី នៅមន្ទីពេទ្រសង្គ្រោះបន្ទាន់ Lakewood Meidical Center សូមជូនដំណឹងនេះដល់មិត្តភ័ក្តិ បងប្អូនសាច់ញាតិទាំងអស់បានជ្រាប់ផង ព្រោះគាត់បានដួលត្រូវក្បាលធ្ងន់ធ្ងរណាស់ គឺបែកសរសៃឈាមក្នុងខួរក្បាលមិនដឹងជាយ៉ាងណាទេ»។
យ៉ាងណាមិញ ក្រោយទទួលបាននូវដំណឹងនេះហើយ មានសាច់ញាតិបងប្អូន ទស្សនិកជនដែលនិយមគាំទ្រអ្នកម្នាងពីដើមមក បាននាំគ្នាជូនពរអ្នកម្នាងគ្រប់ៗគ្នា ឲ្យទទួលបាននូវភាពប្រសើរឡើងវិញ និងឆ្លងផុតនូវគ្រោះចង្រៃមួយនេះផងដែរ៕
