(ភ្នំពេញ)៖ កម្មវិធីប្រឡងចម្រៀងលំដាប់ថ្នាក់ពិភពលោក «X-Factor Cambodia» បានធ្វើការប្រកួតដល់វគ្គ Boot Camp ខណៈដែលមានបេក្ខជន បេក្ខនារីជាច្រើននាក់ ត្រូវបានចាកចេញពីកម្មវិធី និងជាច្រើននាក់ទៀត បានសម្ដែងនូវក្ដីរំភើប ក្រោយបានឆ្លងផុតទៅវគ្គបន្តទៀត ក្នុងនោះ កញ្ញា ជាតិ សុច្ចកា ដែលជាបេក្ខនារីក្នុងកម្មវិធី បានសម្ដែងនូវអារម្មណ៍រំភើប អរស្ទើរហោះ ក្រោយពីបានឆ្លងផុតវគ្គ Boot Camp ក្នុងកម្មវិធីប្រឡងចម្រៀងរបស់ទូរទស្សន៍ហង្សមាស «X Factor Cambodia»។
ជាការពិតណាស់ នៅក្នុងវគ្គ Boot Camp ដែលជាវគ្គចម្រុះដ៏តានតឹងមួយ តម្រូវឲ្យបេក្ខជន-បេក្ខនារី ចាប់ដៃគូគ្នាច្រៀងជាក្រុមក្នុងនោះ ស្រីស្អាត ជាតិ សុច្ចកា បានចាប់ដៃគូប៉ះ ចំបេក្ខភាព៣រូបផ្សេងទៀត មានដូចជា ស្រីស្អាត ចូវ មួយអេង, លោក វណ្ណឌី និង លោក ដាណេ បានបកស្រាយចម្រៀងរួមគ្នា ក្នុងបទ «ឈឺចាប់មួយលានដង» ដោយក្នុងចំណោម បេក្ខជនទាំង៤រូបនោះ មានតែកញ្ញា ជាតិ សុច្ចកា ម្នាក់គត់ដែលទទួលបាននូវជោគជ័យ មានឱកាសបន្តទៅវគ្គក្រោយទៀត ជាហេតុធ្វើឲ្យស្រីស្អាតរូបនេះ រំភើបស្ទើរតែរកអ្វីប្រៀបមិនបាន។
គួរបញ្ជាក់ថា នេះមិនមែនជាលើកទី១ទេ ដែលកញ្ញា ជាតិ សុច្ចកា បានឈានជើងចូលក្នុងកម្មវិធី ប្រឡងចម្រៀងលំដាប់ថ្នាក់ពិភពលោកមួយនេះ ខណៈដែលនាងក៏ធ្លាប់ជាបេក្ខភាព ចូលរួមប្រឡង ក្នុងកម្មវិធី «The Voice Cambodia» រដូវការទី២តែនាង មិនទទួលជោគជ័យ ជាប់ជាជយលាភីឡើយ។ ដោយឡែកសម្រាប់កម្មវិធីថ្មីសន្លាង លំដាប់ពិភពលោក របស់កម្ពុជា «X-Factor Cambodia» ទស្សនិកជនសង្ឃឹមថា ស្រីស្អាតជាតិ សុច្ចកា និងទទួលបានជោគជ័យ តាមបំណងប្រាថ្នា៕