(អ៊ុយរូហ្គាយ)៖ កីឡាករខ្សែប្រយុទ្ធលំដាប់ពិភពលោក Diego Forlan បានប្រកាសចូលនិវត្តន៍ពីវិស័យបាល់ទាត់ជាផ្លូវការហើយក្នុងវ័យ ៤០ឆ្នាំ ក្រោយចូលរួមជាមួយក្លឹបចំនួន ១០ផ្សេងគ្នាគិតចាប់តាំងពីឆ្នាំ១៩៩៧ មក។ នេះបើយោងតាមការចេញផ្សាយដោយព័ត៌មាន Goal នៅថ្ងៃទី៧ ខែសីហា ឆ្នាំ២០១៩។
អតីតសមាជិកនៃក្លឹបធំៗនៅតំបន់អឺរ៉ុបរួមមាន Manchester United, Inter Milan, Atletico Madrid និង Villarreal រូបនេះ បានប្រកាសលាឈប់ពីវិស័យបាល់ទាត់ក្នុងវ័យ ៤០ឆ្នាំ ជាមួយការបង្ហាញខ្លួនលើកចុងក្រោយឲ្យក្លឹប Kitchee ក្នុងលីគកំពូលចិន នៅទីក្រុង Hong Kong នៃឆ្នាំ២០១៩ កាលពីខែឧសភាកន្លងទៅ ដោយបង្ហាញខ្លួនបាន ១២ប្រកួត និងរកបាន ៥គ្រាប់។
កីឡាករសញ្ជាតិអ៊ុយរូហ្គាយ Diego Forlan បានឈ្នះពានបាល់មាស Golden Ball កាលពីអំឡុង FIFA World Cup 2010 នៅប្រទេសអាហ្រ្វិកខាងត្បូង ក្នុងនាមជាកីឡាករលេងល្អបំផុតប្រចាំព្រឹត្តិការណ៍ដែលមានរយៈពេល ៤ឆ្នាំម្តង។ មុនចាកចេញពីវ័ស័យបាល់ទាត់ Forlan បានបង្ហាញខ្លួនលើទីលានសរុបចំនួន ៦៩៣ប្រកួត និងរកបាន ២៧៣គ្រាប់ និង ១១២ប្រកួតផងដែរក្នុងក្រុមជម្រើសជាតិអ៊ុយរូហ្គាយ ជាមួយនឹងការបាន ៣៦គ្រាប់ទៀតផង។
ក្នុងការប្រកបអាជីពបាល់ទាត់ជាង ២០ឆ្នាំមកនេះ Diego Forlan បានឈ្នះពានជាច្រើនទាំងក្នុងក្រុមជម្រើសជាតិអ៊ុយរូហ្គាយ និងក្លឹបជាច្រើនមានដូចជា Copa America, UEFA Europa League, UEFA Super Cup, Premier League, FA Cup, FA Community Shield, Gaucho 1 និងពានក្នុងស្រុក Uruguayan Primera Division ថែមទៀតផង៕