(ភ្នំពេញ)៖ ប្រិយមិត្តទស្សនិកជន ប្រាកដជាបានសណ្ដាប់រួចមកហើយ ជាមួយនឹងបទចម្រៀង កំពុងតែទទួលការគាំទ្រខ្លាំង ពីសំណាក់ទស្សនិកជន គឺបទ «ព្រងើយ» ដែលបកស្រាយដោយ តារាចម្រៀងសំឡេងងស្រទន់ លោក នូ ឧសភា។ យ៉ាងណាមិញ មិនត្រឹមតែមានសមត្ថភាព អាចបកស្រាយចម្រៀងបានយ៉ាងពីរោះរណ្ដំនោះទេ លោកថែមទាំងមានឱកាសបង្ហាញវត្តមាន ក្នុងខ្សែភាពយន្តទៀតផង ខណៈថ្មីៗនេះលោកនូ ឧសភា បានចូលរួមសម្តែងក្នុងខ្សែភាពយន្តខ្នាតធំរឿង «The Clock- Spirit Awakening» ឬ «នាឡិកាដាសវិញ្ញាណ» របស់ផលិតកម្ម LD Picture ក្នុងនោះលោកត្រូវសម្ដែងប៉ះតួឯកស្រី ជាជនជាតិបារាំង ហើយនិយាយជាភាសាបារាំង។
ជាការពិតថ្មីៗនេះ ផលិតកម្ម LD បានបង្ហាញនូវខ្សែភាពយន្តខ្នាតធំរឿងមួយទៀត មានចំណងជើងថា «The Clock- Spirit Awakening» ឬ «នាឡិកាដាសវិញ្ញាណ» ដែលរឿងនេះ គឺជារឿងស្តង់ដារអន្តរជាតិ ហើយជារឿងធំប្រចាំឆ្នាំរបស់ ផលិតកម្ម LD ខណៈដែលមានការចូលរួមសម្ដែងដោយកំលោះសង្ហា នូ ឧសភា បានសម្តែងជាតួអង្គ វិស្វករនាឡិកា នៅសម័យអាណានិគមបារាំង។ អ្វីដែលគួរឲ្យចាប់អារម្មណ៍ទៅទៀតនោះ គឺភាពយន្តនេះតម្រូវឲ្យលោក នូ ឧសភា និយាយភាសាបារាំង ព្រោះថាលោកជាតួអង្គសំខាន់ ដែលត្រូវជាសង្សារបស់តួស្រីដែលជាជនជាតិបារាំង។ «នាឡិកាដាសវិញ្ញាណ» ក៏មានការចូលរួមសម្តែង ពីតារាមានទេពកោសល្យជាច្រើននាក់ទៀត។
យ៉ាងណាមិញ ទស្សនិកជន កំពុងតែរង់ចាំទស្សនា នូវភាពយន្តមួយនេះ ខណៈដែលចង់ឃើញពីសមត្ថភាព របស់តារាចម្រៀង លោក នូ ឧសភា ថាអាចនឹងសម្ដែងបានល្អ កម្រិតណា ពិសេស គឺរសជាតិថ្មីមួយបែបទៀតនៃខ្សែភាពយន្ត ដែលតម្រូវឲ្យប៉ះជាមួយតួស្រីជាអ្នកមកពីបារាំង មានភាពស៊ីសង្វាក់ និងប្រឡាក់ក្រឡាគ្នាបានល្អយ៉ាងណា?
គួរជម្រាប លោកនូ ឧសភា គឺជាតារាចម្រៀងប្រុសមួយរូប ដែលមានទឹកសំឡេងផ្អែមស្រទន់ ពីរោះលន្លង់លន្លោច ពិសេសទស្សនិកជន ស្គាល់ក៏ដូចជាគាំទ្រលោក កាន់តែខ្លាំង តាមរយៈបទចម្រៀងមួយ គឺបទ «ព្រងើយ» ធ្វើឲ្យប្រជាប្រិយភាពតារារូបនេះ កាន់តែមានសន្ទុះ៕