(ភ្នំពេញ)៖ ជាការពិត បើនិយាយពីការរៀបពិធីមង្គលការ គឺតែងតែមានកូនក្រមុំកំលោះ ដែលមានភេទផ្ទុយគ្នា តែថ្មីៗនេះ មានការចែករំលែកតៗគ្នាពេញបណ្តាញទំនាក់ទំនងសង្គម ព្រោះតែក្នុងពិធីមង្គលការមួយនៅប្រទេសថៃ ត្រូវបានគេដឹងថា រៀបការជាមួយនឹងភេទប្រុសដូចគ្នា។ ទោះប្លែកពីមនុស្សភាគច្រើនក្តី តែគេសង្កេតឃើញថា ក្នុងពិធីគឺមានភាពសប្បាយរីករាយជាខ្លាំង ដោយអ្នកចូលរួម និងញាតិមិត្តប្រុសស្រីទាំងសងខាង បានបង្ហាញវត្តមានប្រកបដោយទឹកមុខញញឹមពព្រាយ។
បើតាមការឲ្យដឹងពីប្រភពច្បាស់ការណ៍ បានបញ្ជាក់ថា គូស្នេហ៍ភេទដូចគ្នា ដែលរៀបការយ៉ាងកក្រើកក្នុងប្រទេសថៃនេះ ម្នាក់ឈ្មោះ Paepeerayut Mungkung និង ម្នាក់ទៀតមានឈ្មោះ Mart Maiprasert ។ ពួកគេទាំងពីរបានជ្រើសរើសយកសណ្ឋាគារលំដាប់មួយកណ្តាលទីក្រុងបាងកក ឈ្មោះ The Athenee Hotel, a Luxury Collection Hotel សម្រាប់រៀបចំពិធីមង្គលការ ដោយមានការចូលរួមយ៉ាងច្រើនកុះករពីសំណាក់ញាតិមិត្តទាំងសងខាង ខណៈភ្ញៀវភាគច្រើនជាមិត្តភក្តិ អ្នកជំនួញ និង អ្នកមានទ្រព្យសម្បត្តិ មានមុខមាត់ ក្នុងប្រទេសថៃ ដែលចូលរួមប្រកបដោយភាពសប្បាយរីករាយ។
ដូចពាក្យដែលគេតែងតែលើកឡើងមិនខុសមែនថា ស្នេហាពិតគឺមិនប្រកាន់វណ្ណៈ ពណ៌សម្បុរ ឬ ភេទឡើយ អ្វីដែលសំខាន់នោះ គឺស្ថិតលើចិត្តស្រឡាញ់ ស្មោះស្ម័គ្រ ដែលមានឱ្យគ្នាទៅវិញមកទៅវិញទេតើ។ ជាក់ស្តែង ក្រឡែកមកមើលគូស្នេហ៍ប្រុសថៃមួយគូនេះ បន្ទាប់ពីស្វែងយល់ចិត្តគ្នា និង បានសាងទំនាក់ទំនងស្នេហ៍ យល់ចិត្តថ្លើមគ្នារួចមក ក៏សម្រេចដឹកដៃគ្នាចូលរោងការ មានចាស់ទុំទាំងសងខាងដឹងឭ តាមប្រពៃណី ធ្វើឲ្យគ្រប់គ្នាចាប់អារម្មណ៍យ៉ាងខ្លាំង។ ទាំងនេះបានបញ្ជាក់ថា ពួកគេពិតជាមានក្តីស្រឡាញ់ពិតប្រាកដមែន។
ក្រៅពីគ្រប់គ្នាសម្តែងនូវអារម្មណ៍រំភើបជំនួសគូស្នេហ៍ហាយសូរមួយគូនេះ ក៏មានមិត្តក្នុងបណ្តាញសង្គមជាច្រើនបានជូនពរ គូស្នេហ៍ថ្មីថ្មោងឲ្យស្រឡាញ់គ្នារហូត និងមានសុភមង្គលក្នុងក្រុមគ្រួសារផងដែរ៕
