(សិង្ហបុរី)៖ ប្រទេសសិង្ហុបុរី បានរឹបអូសយកភ្លុកដំរីចំនួន ៨,៨ តោន ដែលជាចំនួនដ៏ធំបំផុត មិនធ្លាប់មានពីមុនមក ចេញពីកុងទឺន័រ ដែលដឹកជញ្ចូនទៅប្រទេសវៀតណាម។ នេះបើតាមការចេញផ្សាយដោយសារព័ត៌មាន CGTN នៅថ្ងៃទី២៥ ខែកក្កដា ឆ្នាំ២០១៩។
អាជ្ញាធរ ប៉ាន់ស្មានថា ភ្លុកទាំងនោះ បានមកពីដំរីអាហ្រ្វិកចំនួនជិត ៣០០ ក្បាល ដែលមានតម្លៃ ១២.៩ លានដុល្លារ។ អ្នកត្រួតពិនិត្យ ក៏បានស្វែងរកឃើញស្រកានៃសត្វពង្រូលចំនួន ១១.៩ តោន ផងដែរ។ ស្រកាទាំងនោះ គឺបានមកពីថនិកសត្វជិតផុតពូជប្រមាណ២,០០០ក្បាល ដែលមានតម្លៃប្រហែល ៣៥.៧ លានដុល្លារ។ អាជ្ញាធរ បានឲ្យដឹងថា សត្វពង្រូល គឺជាថនិកសត្វដែលត្រូវបានគេជួញដូរច្រើនបំផុតនៅលើពិភពលោក។ ស្រការបស់វា ត្រូវបានគេយកទៅប្រើប្រាស់នៅក្នុងឱសថបុរាណ ជាដើម៕
