(បរទេស)៖ បន្ទាប់ពីរឿង «Avatar» បានឈរកាន់កាប់តំណែង ចំណាត់ថ្នាក់លេខ១ រយៈពេល ១០ឆ្នាំមក នៅពេលនេះ Box Office Mojo បានបង្ហាញឲ្យដឹងថា រឿង «Avengers: Endgame» ដែលជាខ្សែភាពយន្តទី២២របស់ MCU បានក្លាយជាខ្សែភាពយន្តអាចរកចំណូលបានច្រើនជាងគេបំផុតក្នុងប្រវត្តិសាស្រ្ត ដោយបានធ្វើការទម្លាក់រឿង «Avatar» ឲ្យឈរចំណាត់លេខ២ វិញម្ដង។
យោងទៅតាមសារព័ត៌មាន BBC បានឲ្យដឹងថា គិតត្រឹមចុងសប្ដាហ៍កន្លងទៅ «Avengers: Endgame» បានគ្រងតំណែងជាផ្លូវការ ជាមួយចំណូលទឹកប្រាក់ជាង ២,៧៩០២ពាន់លានដុល្លារអាមេរិក ដែលអាចយកឈ្នះរឿង «Avatar» រកចំណូលបាន ២.១៨៧ ពាន់លានដុល្លារអាមេរិក។ លោក Kevin Feige ប្រធានផលិតកម្ម Marvel បានធ្វើការប្រកាសពីចំនូល ដែលរកបានពី «Avengers: Endgame» នៅលើឆាកកម្មវិធី Comic-Con ដែលប្រព្រឹត្តទៅកាលចុងសប្ដាហ៍មុន។
«Avengers: Endgame» បានបំបែកកំណត់ត្រា អាចរកចំណូលបានច្រើនជាងគេលេខ២ នៅអាមេរិកខាងជើង ចំនួន ៨៥៣លានដុល្លារ ហើយរឿងមួយនេះ ក៏ក្លាយជារឿងហូលីវូដ អាចរកចំណូលបានច្រើនគេនៅចិនមានចំនួន ៦២៩ លានដុល្លារ។ រឿងមួយនេះ ក៏អាចរកចំណូលបានច្រើនជាងគេ នៅចុងសប្ដាហ៍ដំបូង ទូទាំងពិភពលោកចំនួន ១២២៣លានដុល្លារ៕