(ភ្នំពេញ)៖ លោក អ៊ិន សុភិន ជាផលិតករភាពយន្ត និងចាងហ្វាងផលិតកម្ម «មហាហង្ស» បានសម្ដែងក្ដីសង្ឃឹមខ្ពស់ថា ខ្សែភាពយន្តរឿង «ព្រលឹង» នឹងទទួលបានជោគជ័យពីការរំពឹងទុក ពេលដាក់បញ្ចាំងលើទីផ្សារ បន្ទាប់ពីភាពយន្តមួយនេះ ចំណាយពេលផលិតអស់រយៈពេល១ឆ្នាំ ដោយបានសម្រិតសម្រាំងឡើង ឲ្យមានគុណភាពខ្ពស់ និងមានឈុតឆាក ភ័យរន្ធត់ញាប់ញ័រ តាំងពីដើមរហូតដល់ចប់។
លោក អ៊ិន សុភិន បានថ្លែងយ៉ាងម៉ឺងម៉ាត់ថា ភាពយន្តរឿង «ព្រលឹង» ត្រូវបានផលិតមួយឆ្នាំ ទម្រាំបានបញ្ចាំង ដោយរំពឹងថាភាពយន្តនេះ នឹងទទួលជោគជ័យ មិនខុសពីរឿង «ផ្ទះចុងភូមិ» ព្រោះលោកសម្អាងថា ជារឿងមានរូបភាពភ្លឺច្បាស់ សំឡេងស្ដង់ដារ និងមានគុណភាពេញលក្ខណៈជាភាពយន្ត ហើយឈុតឆាករន្ធត់តាំងពីដើមដល់ចប់ គឺទាក់ចិត្ត។ លោកបន្តថា មួយរឿងនេះ លោកស្រឡាញ់ពេញចិត្តគ្រប់ជំហាន ពោលគឺតាំងពីដំណាក់កាលចេញផលិត ទើបក្នុងពេលប្រកាសសម្ពោធ លោកធ្វើធំដុំ ដោយបានទាំងជូនស្រោមសំបុត្រដល់តារាមួយរូបៗ ដែលជាតួអង្គសម្ដែង អមដោយបាច់ផ្កា ដើម្បីលើកទឹកចិត្តផងដែរ។
ដោយឡែក ក្នុងកម្មវិធីបើកសម្ពោធខ្សែភាពយន្តរឿង «ព្រលឹង» គេសង្កេតឃើញមានការចូលរួមយ៉ាងច្រើនកុះករ ពីសំណាក់អ្នកសិល្បៈ ទាំងក្នុងនិងក្រៅផលិតកម្ម។ មួយវិញទៀត មានរៀបចំជាកម្រាលព្រំក្រហម និងប្រកាសអោយតួសម្ដែងនីមួយៗ ដើរលើកម្រាលព្រំ និងឡើងថ្លែងអារម្មណ៍យ៉ាងមានកិត្តិយស នៅក្នុងពិធី។
គួរជម្រាបថា កាលពីល្ងាចថ្ងៃទី០២ ខែកក្កដា ឆ្នាំ២០១៩ ផលិតកម្មមហាហង្ស បានប្រកាសសម្ពោធ ដាក់បញ្ចាំងជាផ្លូវការខ្សែភាពយន្តរបស់ខ្លួនគឺរឿង «ព្រលឹង» ដែលជាស្នាដៃទី២ ក្នុងឆ្នាំ២០១៩ បន្ទាប់ពីរឿង «ផ្ទះចុងភូមិ» យ៉ាងអធឹកអធម បន្ទាប់ពីខ្សែភាពយន្តរឿង «ព្រលឹង» មួយនេះចំណាយពេលថតអស់រយៈពេលមួយឆ្នាំ ខណៈដែលម្ចាស់ផលិតកម្ម មានក្ដីសង្ឃឹម ក៏ដូចជាជឿជាក់យ៉ាងមុតមាំថា ភាពយន្តថ្មីរបស់ខ្លួន នឹងទទួលបានជោគជ័យលើសពីការរំពឹងទុក។ រឿង «ព្រលឹង» នឹងធ្វើការចាក់បញ្ចាំងនៅក្នុងរោងភាពយន្ត នៅថ្ងៃទី៤ កក្កដា នេះ នៅគ្រប់រោងភាពយន្តទំនើបនានា៕