(ភ្នំពេញ)៖ លោក Conor Nestor គ្រូបង្វឹកក្រុមព្រះខ័នរាជស្វាយរៀង បានធ្វើការសរសើរកូនក្រុម ដ្បិតប្រកួតបញ្ចប់ជុំទី១ បានត្រឹមស្មើក្រុមភ្ញៀវណាហ្គាវើល ០-០ ហើយលោកក៏បានបង្ហើបដែរថា ការប្រកួតនេះក្រុមខ្លួនមានបញ្ហាប្រឈមចំនួនពីរ ដែលនាំឲ្យព្រះខ័នរាជស្វាយរៀង ទទួលបានត្រឹម ១ពិន្ទុផងដែរ។

លោកថា «ខ្ញុំយល់ថា យើងមានបញ្ហាប្រឈមពីរ ដែលបានកើតឡើងក្នុងការប្រកួតនេះ ប៉ុន្ដែអ្វីៗក៏អាចកើតឡើងបានដែរ នៅពេលដែលអ្នកមិនបានលឺសំឡេងកញ្ចែទេនោះ ដូច្នេះអ្នកត្រូវតែលេងបន្ដ។ ខ្ញុំគិតថា ពួកយើងធ្វើបានយ៉ាងល្អជាមួយរឿងទាំងអស់នេះ ប៉ុន្ដែខ្ញុំក៏បានគិតដែរថា ប្រសិនបើអ្នកកំពុងតែធ្វើការប្រកួតប្រជែងខ្លាំង អ្នកមិនត្រូវបោះបាល់ឲ្យលឿនពេកនោះទេ គឺជាការខកចិត្តដ៏ធំសម្រាប់ខ្ញុំ ពួកយើងមិនបានបោះបាល់ឲ្យលឿននោះទេ យើងបានលេងប៉ះទៅប៉ះមកជាច្រើនដង។ យើងបានព្យាយាមពេកក្នុងការប្រកួតផងដែរ»។

យ៉ាងណាមិញ គ្រូបង្វឹកជនជាតិអៀរឡង់រូបនេះ បានទទួលស្គាល់ណាហ្គាវើល ក៏ធ្វើបានល្អដែរ ព្រោះពួកគេត្រូវការជ័យជម្នះ ប៉ុន្ដែព្រះខ័នរាជស្វាយរៀង ក៏ព្យាយាមលេងបានយ៉ាងល្អដែរ ទើបនាំឲ្យលទ្ធផលស្មើគ្នា ០-០ បែបនេះ។ បន្ថែមលើនេះ លោកបានជំរុញកូនក្រុមត្រូវបន្ដការខិតខំប្រឹងបន្ថែមទៀត ដើម្បីបង្កើនភាពជឿជាក់ និងធ្វើបានកាន់តែល្អនៅជុំទី២ ដែលនឹងបន្ដការប្រកួតនាចុងសប្ដាហ៍នេះ។

គួរដឹងថា ក្រោយបញ្ចប់ជុំទី១ ព្រះខ័នរាជស្វាយរៀង បានឈរកំពូលតារាង ដោយមាន ៣៣ពិន្ទុនាំមុខគូប្រជែង ៥ពិន្ទុ ជាមួយលទ្ធផល ១៣ប្រកួត ឈ្នះ១០ និងស្មើ៣ មិនស្គាល់ចាញ់ម្ដងឡើយ។ ចំពោះជំនួបបើកឆាកជុំទី២ នាចុងសប្ដាហ៍នេះ ក្រុមលោក Conor ត្រូវប៉ះក្រុមអគ្គស្នងការដ្ឋាននគរបាលជាតិ នៅកីឡដ្ឋានអគ្គិសនីកម្ពុជា នាថ្ងៃទី០៧ ខែមិថុនាខាងមុខ៕