(ភ្នំពេញ)៖ ពិធីឧទ្ទិសកុសលដល់ដួងវិញ្ញាណក្ខន្ធកម្មករ-កម្មការិនីទាំង២៨នាក់ ដែលបានស្លាប់ដោយការបាក់រលំអគារ នៅខេត្តព្រះសីហនុ នាព្រឹកថ្ងៃព្រហស្សតិ៍ ទី២៧ មិថុនានេះ នៅវត្តនាគវ័ន្ត កុដិលេខ២៤ អ្នកសិល្បៈល្បីៗជាច្រើនដួង ដឹកនាំឲ្យប្រធានសមាគមសិល្បករខ្មែរ អ្នកនាង ចន ច័ន្ទលក្ខិណា និងព្រះព្រហ្ម វិជ្ជា នី សុវណ្ណ មុនី រ៉េត បានរៀបចំវិធីបុណ្យគម្រប់៧ថ្ងៃជូន នៅថ្ងៃនេះ។
ប្រធានសមាគមសិល្បករខ្មែរ អ្នកនាង ចន ច័ន្ទលក្ខិណា បានអំពាវនាវដល់បងប្អូនសិល្បករ-សិល្បការិនី និងបងប្អូនជនរួមជាតិខ្មែរទាំងអស់ សូមគោរពអញ្ជើញចូលរួមពិធីបុណ្យទក្ខិណានុប្បទាន ដើម្បីឧទ្ទិសកុសលជូនដួងវិញ្ញាណក្ខន្ធចំពោះបងប្អូនជនរងគ្រោះ ដែលបានស្លាប់ដោយឧបទ្ទវហេតុបាក់រលំអគារ៧ជាន់ នៅខេត្តព្រះសីហនុ កាលពីពេលកន្លងទៅថ្មីៗនេះ។
អ្នកនាង ចន ច័ន្ទលក្ខិណា បានបញ្ជាក់ថា ការប្រកាសអញ្ជើញបងប្អូនជាសាធារណៈបែបនេះ អ្នកនាងសង្ឃឹមថា បងប្អូននឹងមិនប្រកាន់ ព្រោះអ្នកនាងបានអញ្ជើញក្នុង Group រួចហើយ អ្នកនាងអត់មានពេលឆាត Private បានគ្រប់ៗគ្នាទេ ព្រោះមានការងារច្រើនដែលត្រូវធ្វើ។ ដូច្នេះបើក្រុមការងារ ឬជំនួយការអ្នកនាងទូរស័ព្ទអញ្ជើញបងប្អូន សូមកុំប្រកាន់។
ទីតាំងដែលរៀបចំពិធីបុណ្យ គឺនឹងប្រព្រឹត្តធ្វើឡើងនៅវត្តនាគវ័ន វេលាម៉ោង៨ព្រឹកថ្ងៃទី២៧មិថុនា ខណៈអ្នកផ្តើមកម្មវិធីរួមមាន ព្រះព្រហ្ម វិជ្ជា នី សុវណ្ណ មុនី រ៉េត មេកុដិលេខ២៤ វត្តនាគវ័ន រាជធានីភ្នំពេញ, ប្រធានសមាគមសិល្បករខ្មែរ និងអ្នកសិល្បៈល្បីៗជាច្រើនរូបទៀត៕