(ភ្នំពេញ)៖ ក្នុងនាមជាជនជាតិខ្មែរតែមួយ និងដើម្បីឧទ្ទិលបុណ្យកុសលជូនដួងវិញ្ញាណក្ខន្ធជនរងគ្រោះ ដែលបានបាត់បង់ជីវិតដោយសារឧបទ្ទវហេតុ រលំបាក់អគា៧ជាន់ នៅខេត្តព្រះសីហនុ អ្នកនាង ចន ច័ន្ទលក្ខណា ជាប្រធានសមាគមសិល្បករខ្មែរ ព្រមទាំងអ្នកផ្តើមបុណ្យមួយចំនួនទៀត រួមទាំងសិល្បករ-សិល្បការិនី បានរួមគំនិតគ្នាធ្វើបុណ្យ៧ថ្ងៃ នៅថ្ងៃទី២៧ ខែមិថុនា ឆ្នាំ២០១៩នេះ។
តាមគណនីហ្វេសប៊ុកផ្លូវការរបស់អ្នកនាង ចន ច័ន្ទលក្ខិណា បានសរសេរសារយ៉ាងដូច្នេះថា «នៅថ្ងៃទី២៧ ស្អែកនេះ នាងខ្ញុំសូមគោរពអញ្ជើញបងប្អូនសិល្បករ-សិល្បការនី និង បងប្អូនជនរួមជាតិខ្មែរទាំងអស់ សូមគោរពអញ្ជើញចូលរួមពិធីបុណ្យទក្ខិណានុប្បទាន ដើម្បីឧទ្ទិសកុសលជូនដួងវិញ្ញាណក្ខន្ធ ចំពោះបងប្អូនជនរងគ្រោះ ដែលបានស្លាប់ដោយឧបទ្ទវហេតុរលំបាក់ អគា៧ជាន់ នៅខេត្តព្រះសីហនុ»។
អ្នកនាងបានសរសេរបន្តថា «អ្នកផ្តើមបុណ្យ, ព្រះព្រហ្មវិជ្ជា នី សុវណ្ណមុនីរ៉េត មេកុដិលេខ២៤ វត្តនាគវ័ន រាជធានីភ្នំពេញ, ប្រធានសមាគមសិល្បករខ្មែរ និងសមាជិក សមាជិកា, កញ្ញា So Danita (សូ ដានីតា)និង លោក Tan Kimsour (តាន់ គឹមសួរ)»។
អ្នកនាង ចន ច័ន្ទលក្ខណា បានបន្ថែមថា «នាងខ្ញុំ សូមជំរាបបងប្អូនសិល្បៈឲ្យបានជ្រាបថា នាងខ្ញុំផុសអញ្ជើញបងប្អូនជាសាធារណៈបែបនេះ នាងខ្ញុំសង្ឃឹមថា បងប្អូន និងមិនប្រកាន់ ព្រោះនាងខ្ញុំបានអញ្ជើញក្នុង Group រួចហើយ ខ្ញុំអត់មានពេលឆាត Private បានគ្រប់ៗគ្នាទេ ព្រោះខ្ញុំមានការងារច្រើនដែលត្រូវធ្វើ។ ដូច្នេះបើក្រុមការងារ ឬជំនួយការខ្ញុំ Call អញ្ជើញបងប្អូនសូមកុំប្រកាន់ ដូច្នេះសូមមេត្តាបងប្អូនជួយឆ្លើយតប ក្នុងខមមិននៃសារ ដែលនាងខ្ញុំបានបង្ហោះអញ្ជើញបងប្អូន ជាសាធារណៈដោយអនុគ្រោះផង ព្រោះស្អែកនេះខ្ញុំរវល់ជាមួយកម្មវិធី ដែលជាន់គ្នាច្រើន ហើយសុទ្ធតែជាកម្មវិធីដើម្បីសង្គមដូចគ្នា។ ជាការងារដើម្បីជនរងគ្រោះខ្មែរយើងទេ»។
គួរជម្រាបថា កម្មវិធីបុណ្យត្រូវធ្វើឡើង ចាប់ព្រឹកថ្ងៃទី២៧ ខែមិថុនា ចាប់ពីវេលាម៉ោង ៨៖០០នាទី នៅទីតាំងវត្តនាគវ័ន រាជធានីភ្នំពេញ និងបញ្ចប់នៅព្រឹកថ្ងៃទី២៨ ខែមិថុនា ឆ្នាំ២០១៩នេះ៕