(បរទេស)៖ គំនូរជីវចលរឿង «Mulan» របស់Disney ដែលល្បីល្បាញកាលពីឆ្នាំ១៩៩៨ ត្រូវបានលើកយកមកថតខ្សែភាពយន្តជាលើកដំបូង ដោយក្នុងនោះតារាស្រី ដែលច្រើនគេស្គាល់ថាសៀវឡុងនី ដែលមានឈ្មោះពិត Liu Yifei បានសម្តែងជាតួអង្គ Mulan។ មិនត្រឹមតែប៉ុណ្ណោះ តារាសម្ដែងជាច្រើននាក់ទៀត នៅក្នុងខ្សែភាពយន្តមួយនេះ ក៏នឹងដើរតួសំខាន់នៅក្នុងរឿងមួយនេះ ផងដែរ។
នៅក្នុងនោះ មានដូចជា តារាសម្ដែងស្រី Liu Yifei ត្រូវសម្ដែងជា Mulan, Jet Li សម្ដែងជារាជាធិរាជប្រទេសចិន, Donnie Yen សម្ដែងជាមេទ័ពTung, តារាសម្ដែង Gong Li ជាតួអង្គចិត្តអាក្រក់, Xana Tang តួអង្គបងស្រីរបស់ Mulan, Yoson An សម្ដែងជាតួអង្គ Chen Honghui ជាគូស្នេហ៍ Mulan ខុសពីរឿងតុក្កតាដែលគូស្នេហ៍របស់ Mulan ជា Li Shang, Jason Scott តួអង្គចិត្តអាក្រក់, Utkarsh Ambudkar តួអង្គ Skath, Chum Ehelepola ជាតួអង្គ Ramtish, Ron Yuan សម្ដែងជាតួអង្គទាហាន, Jimmy Wong សម្ដែងជាតួអង្គ Ling និងDoua Moua សម្ដែងជាតួអង្គ Chien-Po។
ដំបូងឡើយ ខ្សែភាពយន្តរឿង «Mulan»នេះ មានគម្រោងចាក់បញ្ចាំងជាផ្លូវការនៅថ្ងៃទី០២ខែវិច្ឆិកា ឆ្នាំ២០១៨ ប៉ុន្តែត្រូវបានប្រកាសថានឹងត្រូវលើកទៅបញ្ចាំងក្នុងអំឡុងពេលណាមួយក្នុងឆ្នាំ២០១៩។ ខាងស្ទូឌីយោផលិតរឿង «Mulan» បានប្រកាសជាសាធារណៈថារឿងមួយនេះនឹងត្រូវពន្យារពេលជាថ្មីម្ដងទៀត ដែលអាចនឹងបញ្ចាំងជាផ្លូវការនៅគ្រប់បណ្ដារោងកុននៅថ្ងៃទី២៧ ខែមិនា ឆ្នាំ២០២០វិញ។ ខ្សែភាពយន្តរឿង «Mulan» នេះដែរ ត្រូវបានថតនៅប្រទេសមួយចំនួនដូចជា ប្រទេសចិន ញ៉ូហ្សេឡែន និងប្រទេសអូស្ត្រាលី៕
