(ភ្នំពេញ)៖ ប្រិយមិត្តទស្សនិកជនប្រហែលជាភ្លេចមុខអតីតតារាចម្រៀងជើងចាស់ ដ៏ល្បីឈ្មោះកាលពីជាង២០ឆ្នាំមុន លោក សែម សង្វាត ដែលលោកជាតារាចម្រៀងមួយរូប មានភាពល្បីល្បាញ មានកេរ្តិ៍ឈ្មោះបោះសំឡេង ជាពិសេសនោះគឺមានការគាំទ្រពីទស្សនិកជន។ យ៉ាងណាមិញ ក្រោយពីចាកឆ្ងាញពីសិល្បៈអស់រយៈពេលជាង២០ឆ្នាំ តើអតីតតារាចម្រៀងល្បីឈ្មោះ លោក សែម សង្វាត មានសុខទុក្ខ ក៏ដូចជាជីវភាពគ្រួសារលំបាក ឬក៏ស្រណុកស្រុកស្រួលយ៉ាងណា និងរស់នៅកន្លែងណាដែរ?
ជាការពិតណាស់ ចំពោះការបាត់វត្តមានសូន្យឈឹងពីពិភពសិល្បៈប្រមាណជាង២០ឆ្នាំ របស់ លោក សែម សង្វាត ទស្សនិកជនពិតជាចង់ដឹងណាស់ ថារូបលោកមានសុខទុក្ខយ៉ាងណា។ តាមពិតទៅ ចំពោះការឃ្លាតឆ្ងាយពីសិល្បៈទាំងគ្មានដំណឹង គឺរូបលោកមិនបានទៅលាក់ខ្លួនពួនអាត្មានៅទីណានោះទេ ពោលគឺដោយសារតែរូបលោកមានបញ្ហាសុខភាព រយៈពេលប្រមាណជាង៣ឆ្នាំ ចាប់តាំងពីលោកចូលច្រៀងដំបូង ប៉ុន្តែដោយសារតែលោកប្រឹងធ្វើការរកស៊ីបន្ថែមទៀត ទើបធ្វើឲ្យលោកបានធ្លាក់ខ្លួនឈឺកាន់តែធ្ងន់ធ្ងរឡើង។ ដូច្នេះហើយទើបធ្វើឲ្យលោកឃ្លាតឆ្ងាយពីសិល្បៈ។ យ៉ាងណាក្ដី បច្ចុប្បន្នសុខភាពរបស់អតីតតារាចម្រៀង លោក សែម សង្វាត គឺមានសុខភាពល្អធម្មតាទេ។
ជាមួយគ្នានេះ តារាចម្រៀងជើងចាស់ លោក សែម សង្វាត ក៏បានថ្លែងសួរសុខទុក្ខដល់ទស្សនិកជន អ្នកគាំទ្ររូបលោកផងដែរ។ យ៉ាងណាលោកមិនបានបង្ហើបថា លោកនឹងមានគម្រោងត្រឡប់ចូលសិល្បៈវិញ ខណៈបច្ចុប្បន្នតារាចម្រៀងជើងចាស់រូបនេះក៏មានវ័យជ្រេបន្តិចទៅហើយដែរ។
គួររំឭកផងដែរថា លោក សែម សង្វាត គឺជាអតីតតារាចម្រៀងមួយរូប ដែលមានកេរ្តិ៍ឈ្មោះល្បីល្បាញនៅក្នុងស្រទាប់សិល្បៈ ប៉ុន្តែដោយសារតែមានជំងឺប្រចាំកាយធ្ងន់ធ្ងរ បានធ្វើឲ្យតារាចម្រៀងមួយដួងនេះបាត់វត្តមានសូន្យពីសិល្បៈរយៈពេលជាង២០ឆ្នាំ។ ស្របជាមួយគ្នានឹងការបាត់ដំណឹងនេះ លោកត្រូវបានគេដឹងថា ក្លាយជាអាជីវកររកស៊ីលក់កាបូបនៅក្នុងផ្សារប៉ោយប៉ែត និងផ្សាររ៉ុងក្លឿ ប្រទេសថៃផងដែរ។ ទើបតែថ្មីៗនេះ ស្រាប់តែលេចវត្តមានលោកឡើងវិញ ធ្វើឲ្យទស្សនិកជនជាច្រើនបានសម្ដែងនូវការនឹករឭកដល់លោកយ៉ាងខ្លាំង៕