(ភ្នំពេញ)៖ ជាការពិតណាស់ ភាពភ្ញាក់ផ្អើលបានកើតឡើង នៅក្នុងបណ្ដាញសង្គមហ្វេសប៊ុក ខណៈដែលអតីតតារាចម្រៀង លោក បូ វិចិត្រ ម្ចាស់បទ «ប៊ិះស៊យ» បានបង្ហាញខ្លួនគួរឲ្យអាណិត។ បន្ទាប់ពីរឿងរ៉ាវនេះ បានផ្ទុះកក្រើកឡើង បានធ្វើឲ្យមហាជនចាប់អារម្មណ៍ ហើយអ្នកសិល្បៈ ក៏មិនបានឈរឱបដៃ ព្រងើយកន្តើយមើលនឹងភ្នែកដែរ ដោយបានស្កាត់ជួបសួរនាំ និងផ្ដល់ជំនួយជាបន្តបន្ទាប់។
យ៉ាងណាមិញ នៅល្ងាចថ្ងៃទី២០ ខែមិថុនា ឆ្នាំ២០១៩ នេះលោក ហេង ឡុង និងអ្នកនាង ចន ច័ន្ទលក្ខិណា បានជួបផ្ទាល់ជាមួយ លោក ប៊ូ វិចិត្រ ដែលជាម្ចាស់បទ «ប៊ិះស៊យ» ហើយ។ ក្រោយពីបានសួរនាំរួចមក កាន់តែអាណិត ដល់អតីតតារាចម្រៀងរូបនេះជាខ្លាំង ព្រោះមានពេលខ្លះលោកអត់មានបាយហូបក៏មាន ចំណែកនៅពេលនេះ ក៏មានជំងឺប្រចាំកាយថែមទៀត ព្រោះលោកធ្លាប់ធ្លាក់ពីលើដើមក្ងោក។
លោក ហេង ឡុង ក៏ទើបភ្ជាប់សារដ៏រំជួលចិត្តមួយទាក់ទង បូ វិចិត្រ ដោយបញ្ជាក់ថា «រឿងការពិតត្រូវបានលាតត្រដាងប្អូន បូ វិចិត្រ គឺគាត់មានបញ្ហាបាត់ការចងចាំ និងមិនប្រក្រតី។ សមាគមសិល្បករនឹងព្យាយាមជួយព្យាបាលគាត់ និងតាមដានពីជីវភាពប្រចាំថ្ងៃរបស់គាត់។ អរគុណសម្រាប់ការចែកចាយព័ត៌មានពិត»។
នៅថ្ងៃដដែលនេះដែរ មហាជនជាច្រើនមានការភ្ញាក់ផ្អើល និងចាប់អារម្មណ៍ជាខ្លាំង ក្រោយពីម្ចាស់ហ្វេសប៊ុកម្នាក់ឈ្មោះ «Jenny Chamroeun» បានជួបផ្ទាល់ជាមួយអតីតតារាចម្រៀង បូ វិចិត្រ ក្នុងសភាពដុនដាប អាយ៉ែឡានឲ្យគេ នៅក្បែរក្លឹបកម្សាន្ត ៥៥ នៅជិតអាហារដ្ឋាន យាយម្លូរ។ ម្ចាស់ហ្វេសប៊ុករូបនេះ ព្រោះតែក្តីអាណិតក៏បានបង្ហោះវីដេអូ និងរូបភាពរបស់ បូ វិចិត្រ ចូលទៅក្នុងហ្វេសប៊ុក ក្រែងមានសប្បុរសជនណាអាចជួយសម្រួលដល់ទុក្ខលំបាកអតីតតារារូបនេះបាន។
ពិតហើយថា បន្ទាប់ពីជួបលោក ហេង ឡុង និងអ្នកនាង ចនច័ន្ទលក្ខិណា រួចមក សមាគមសិល្បករខ្មែរបានឧបត្ថម្ភជាទឹកប្រាក់ចំនួន ២០០ដុល្លារ, អ្នកនាង ស៊ិន ឧត្តមផល្លា ឧបត្ថម្ភ១០០ដុល្លារ, គង់ ច័ន្ទសូរិយា ១០០ដុល្លារ, អ្នកនាង Lina DY ២០ដុល្លារ, ប្អូនស្រី លីណា ម៉ាក់ហ៊ាតុងអូនយ៉ុង ២០ដុល្លារ សរុបបានចំនួន ៤៤០ដុល្លារ ខណៈនៅថ្ងៃនេះលោក បូ វិចិត្រ នឹងទិញទូរស័ព្ទមួយគ្រឿងសម្រាប់ប្រើ ដើម្បីងាយស្រួលទំនាក់ទំនងដោយសារការចងចាំរបស់លោកមិនសូវល្អ ព្រោះកន្លងមកលោកធ្លាប់គ្រោះថ្នាក់ចរាចរណ៍ត្រូវក្បាលផ្នែកខាងក្រោយ៕
