(ភ្នំពេញ)៖ អតីតតារាកំប្លែងស្រីអយ (ហៅក្អយ) ដែលទស្សនិកជនភាគច្រើនស្ទើរតែភ្លេចមុខទៅហើយនោះ ដោយសារការបាត់វត្តមានជាច្រើនឆ្នាំពីសិល្បៈ ព្រោះតែមានព័ត៌មានអាស្រូវបោកប្រាស់លុយកាក់ក្នុងរបររកស៊ីរបស់នាង ខណៈថ្មីៗនេះស្រាប់តែលេចមុខ អតីតតារាកំប្លែង ដែលធ្លាប់មានប្រជាប្រិយភាពរូបនេះចូលរោងការរៀបការប្ដីថ្មី ធ្វើឲ្យទស្សនិកជនមានការចាប់អារម្មណ៍យ៉ាងខ្លាំង ពេលនាងលេចមុខជ្រងោៗបែបនេះ។
ជាការពិត កាលពីដើមសប្ដាហ៍កន្លងទៅនេះ អតីតតារាកំប្លែង ស្រីអយ បានធ្វើពិធីរៀបអាពាហ៍ពិពាហ៍ជាមួយស្វាមីថ្មីរបស់ខ្លួនយ៉ាងអធិកអធម។ មានការបង្ហើបឡើងថា អតីតតារាកំប្លែងស្រីអយ និងស្វាមី ដែលទើបនឹងរៀបការ គឺបានរស់នៅជាមួយគ្នាជាយូរឆ្នាំមកហើយ ខណៈពួកគេទាំងពីរមានកូនស្រីជំទង់ម្នាក់ ដែលជាចំណងដៃ ទើបអ្នកនាង និងស្វាមី សម្រេចចិត្តរៀបការបំពេញមុខមេបា។
ដោយឡែក គេចាប់អារម្មណ៍ឃើញថា ក្នុងពិធីរៀបការរបស់ ស្រីអយ គឺបានរៀបចំឡើងយ៉ាងអធិកអធម ដោយមានការចូលរួមយ៉ាងច្រើនកុះករពីសំណាក់តារាចម្រៀង តារាសម្ដែង ប្រុសស្រីល្បីៗ ពោលគឺមានដូចជា តារាពហុជំនាញ អ្នកនាង ខាត់ សុខឃីម, អ្នកនាង ចន ច័ន្ទលក្ខិណា, តារាកំប្លែងនាយ ចាបចៀន, អ្នកនាង លី ចាន់សីហា, ប៉ុបពី រួមទាំងសិល្បករ-សិល្បការនីជាច្រើនរូបទៀត។
គួររំឭកផងដែរថា អ្នកនាង អយ ជាអតីតតារាកំប្លែង ដែលមានប្រជាប្រិយភាព និងមានការគាំទ្រខ្លាំងគួរសមពីសំណាក់ទស្សនិកជន តែដោយសារមានរឿងអាស្រូវជាប់ខ្លួន ទើបធ្វើឲ្យតារាស្រីរូបនេះ គឺបាត់មុខរាប់ឆ្នាំពីវិស័យសិល្បៈ។ ទើបតែថ្មីៗនេះ នាងលេចមុខរៀបការប្ដីថ្មីតែម្ដង។ ទោះជាយ៉ាងណា ក៏ប្រិយមិត្តទស្សនិកជនធ្វើការជូនពរឲ្យនាង និងស្វាមី មានសុភមង្គលក្នុងគ្រួសារផងដែរ៕