(ភ្នំពេញ)៖ តារាសម្តែងស្រីរូបស្រស់សម្រស់ឆើតឆាយ គួរជាទីចាប់ចិត្តដល់ទស្សនិកជន កញ្ញា នៅ ដាណា បច្ចុប្បន្នហាក់កំពុងមានប្រជាប្រិយភាព និងត្រូវបានទស្សនិកជនស្គាល់ច្រើន តាមរយៈស្នាដៃសម្តែងភាពយន្ត ក៏ដូចជាធ្វើពិធីនិរីតាមកម្មវិធីសិល្បៈតូចធំនានា។ យ៉ាងណាមិញ តារាស្រីរូបនេះ នឹងចូលរួមជាតារាកិត្តិយសក្នុងកម្មវិធី «អាថ៌កំបាំងក្រៅឆាករបស់តារា» នៅថ្ងៃសៅរ៍ចុងសប្តាហ៍នេះ ដើម្បីបង្ហាញដល់ទស្សនិកជនពីបរិបទជីវិតផ្ទាល់ខ្លួនរបស់នាង និងការតស៊ូ ព្យាយាមពុះពារឧបសគ្គនានាក្នុងវិស័យសិល្បៈ។
ជាការគត់សម្គាល់ តារាស្រីរាងខ្ពស់ស្រឡះ កញ្ញា នៅ ដាណា មួយរយៈចុងក្រោយនេះកំពុងមានឱកាសច្រើន ក្នុងការបញ្ចេញសមត្ថភាព និងទេពកោសល្យសិល្បៈរបស់នាង តាមរយៈការសម្តែង និងចាប់យកអាជីពជាពិធីការិនី ដែលនេះប្រៀបបាននឹងផ្លូវមួយជួយជំរុញឲ្យ ដាណា មានទីផ្សារកើនឡើងបន្ថែមទៀត។ ផ្ទុយពីនេះ ងាកមកអាថ៌កំបាំងផ្ទាល់ខ្លួន រឿងរ៉ាវប្រវត្តិសិល្បៈវិញនោះ ទស្សនិកជនហាក់មិនទាន់បានជ្រាប់នៅឡើយទេ ថាតារាស្រីរូបនេះ ចូលសិល្បៈតាមរយៈអ្វី និងបច្ចុប្បន្នដើរដល់កម្រិតណាហើយនោះ។
ដូច្នេះរាល់ចម្ងល់ និងអាថ៌កំបាំងទាំងនេះ កញ្ញា នៅ ដាណា នឹងមកបង្ហាញដល់ទស្សនិកជនឲ្យជ្រាប់កាន់តែច្បាស់ តាមរយៈចូលរួមជាតារាកិត្តិយសក្នុងកម្មវិធី «អាថ៌កំបាំងក្រៅឆាករបស់តារា» នៅថ្ងៃសៅរ៍ចុងសប្តាហ៍នេះ។ កម្មវិធីនេះ នឹងធ្វើការផ្សាយផ្ទាល់នៅវេលាម៉ោង៧៖០០នាទី ដល់ម៉ោង ៨៖០០នាទីយប់ តាមរយៈការផ្សាយរបស់បណ្តាញព័ត៌មាន Fresh News, ទូរទស្សន៍ព័ត៌មាន Fresh News, Khmer Talking និងផ្សាយតាមរយៈទូរទស្សន៍ខ្សែកាបទូទាំងប្រទេស៕