(ភ្នំពេញ)៖ ខ្សែភាពយន្តខ្នាតធំថ្មីមួយទៀត របស់ផលិតកម្ម មាតុចក្រហ្វីលម៍ មានចំណងជើងថា «ទារុណកម្មខ្មោច» ដែលជាភាពយន្តឆ្លុះបញ្ចាំង ពីការធ្វើទារុណកម្មយ៉ាងព្រៃផ្សៃ កាលពីសម័យខ្មែរក្រហម ( របប ប៉ុល ពត) ៣ឆ្នាំ ៨ខែ ២០ថ្ងៃរបស់ប្រទេសកម្ពុជា ត្រូវបានផលិតករប្រកាសជាសាធារណៈថា នឹងគ្រោងយកទៅបញ្ចាំង នៅតាមបណ្ដានានាក្នុងតំបន់អាស៊ាន មានដូចជា ថៃ ឡាវ មីយ៉ាន់ម៉ា និងប្រទេសមាឡេស៊ី ជាដើម ដែលហាក់បង្ហាញឲ្យឃើញថា វិស័យភាពយន្តរបស់ប្រទេសកម្ពុជា កំពុងតែឆ្ពោះទៅរកភាពរីកចម្រើន នៅលើទីផ្សារអន្តរ ជាបន្តបន្ទាប់។
ការប្រកាសឲ្យដឹង គួរឲ្យភ្ញាក់ផ្អើលបែបនេះ ត្រូវបានធ្វើឡើង នៅក្នុងកម្មវិធីបើកសម្ពោធ ដាក់បញ្ចាំងជាផ្លូវការ កាលពីល្ងាចថ្ងៃទី ២៥ ខែកុម្ភៈ ឆ្នាំ២០១៩ នេះ នៅក្នុងផ្សារទំនើប អ៊ីអន ដោយនៅក្នុងពិធីបើកសម្ពោធខ្សែភាពយន្ត មួយនេះ គេសង្កេតឃើញមានការចូលរួមយ៉ាងច្រើនកុះករ ពីសំណាក់តារាចម្រៀង តារាសម្ដែង, តារាកំប្លែង និងផលិតករ ជាច្រើនផងដែរ។
លោក ហ៊ុយ យ៉ាឡេង ម្ចាស់ផលិតកម្ម មាតុចក្រហ្វីលម៍ ឲ្យដឹងថា រឿង «ទារុណកម្មខ្មោច» ដែលចំណាយទុនផលិតអស់៧ម៉ឺនដុល្លារនេះ នឹងយកទៅបញ្ចាំងនៅប្រទេសថៃ ឡាវ មីយ៉ាន់ម៉ា និង ម៉ាឡេស៊ី ប៉ុន្តែរង់ចាំការពិភាក្សាគ្នាសិន ពាក់ព័ន្ធនឹងគោលបំណងនេះ។ កន្លងមក ភាពយន្តរបស់ផលិតករ ធ្លាប់ជាអតីតបងធំ ប្រចាំសាលាក្នុងខេត្តបន្ទាយមានជ័យរូបនេះ ធ្លាប់បានដាក់បញ្ចាំង នៅក្រៅប្រទេសញឹកញាប់ដូចជា រឿង «ធ្មប់» បញ្ចាំងនៅអាមេរិក ចិន ប្រ៊ុយណេ, រឿង «វិកលចរិត» បញ្ចាំងនៅប្រទេសចិនជាដើម និងព្រមទាំងទទួលបាន ពានរង្វាន់អន្តរជាតិជាច្រើន ផងដែរ។
លោក ហ៊ុយ យ៉ាឡេង បានបន្តឲ្យដឹងទៀតថា ចំពោះខ្សែភាពយន្តរឿង «ទារុណកម្មខ្មោច» គឺលោកបានសម្រិតសម្រាំងឡើង យ៉ាងល្អឥតខ្ចោះ ទាំងគុណភាព ទាំងអត្ថន័យ បែបអប់រំ ដែលបង្កប់នៅក្នុងសាច់រឿងមួយនេះ។ ជាពិសេសសាច់រឿង បែបរន្ធត់មួយនេះ បានបង្ហាញដល់អ្នកទស្សនា ឲ្យដឹងពីការធ្វើទារុណកម្ម នៅក្នុងរបបខ្មែរក្រហម ដែលធ្វើទារុណកម្ម មកលើប្រជាពលរដ្ឋកម្ពុជា បង្កប់នៅក្នុងខ្សែភាពយន្តនេះផ្ទាល់ ខណៈសាច់ទាំងមូល ប្រាកដជាធ្វើឲ្យទស្សនិកជន ជាពិសេសយុវវ័យជំនាន់ក្រោយ យលដឹងកាន់តែច្បាស់ របបខ្មែរក្រហម បន្ទាប់ពីពួកគេមិនបានឆ្លងកាត់។
យ៉ាងណាមិញ បន្ទាប់ពីធ្វើការដាក់បញ្ចាំងនៅកម្ពុជារួចហើយ លោក ហ៊ុយ យ៉ាឡេង គ្រោងនឹងដាក់បញ្ចាំងខ្សែភាពយន្តរឿង «ទារុណកម្មខ្មោច» មួយនេះ ក្នុងប្រទេសមួយចំនួន នៅតំបន់អាស៊ាន នៅពាក់កណ្ដាលខែមិនា ខាងមុខនេះ ដែលធ្វើឲ្យរូបលោក មានការរំពឹងយ៉ាងមុតមាំថា នឹងទទួលបានជោគជ័យ នៅលើឆាកអន្តរជាតិ បន្ទាប់ពីរឿងជាច្រើនរបស់លោក ដែលមានដូចជារឿង «ធ្មប់» និងរឿង «វិកលចរិត» ទទួលបានការគាំទ្រ និងឈ្នះពានរង្វាន់អន្តរជាតិរួចមកហើយនោះ៕