(ភ្នំពេញ)៖ បេក្ខជនតំណាងឱ្យប្រទេសកម្ពុជា ក្នុងកម្មវិធី «Mister & Miss Asian International» 2019 លោក ឡៅ បញ្ញា ត្រូវបានមហាជនដឹងថា លោកគឺជា អ្នកសម្ដែងក្បាច់គុនល្បុក្កតោ និងសម្ដែងអច្ឆរិយអង្គរនៅទឹកដីខេត្តសៀមរាបមួយរូប ដែលរូបរាងខ្ពស់ ស្រស់សង្ហារគួរឱ្យទាក់ទាញ។ យ៉ាងណាមិញ តាមរយៈចូលរួមប្រកួតក្នុងកកម្មវិធី លំដាប់ថ្នាក់ពិភពលោក ខាងលើ លោក ឡៅ បញ្ញា ទទួលបានចំណាត់ថ្នាក់រងផ្ទួនៗគ្នា ដែលធ្វើឱ្យអ្នកគាំទ្រជាច្រើន មានមោទនភាពចំពោះរូបលោក បើទោះបីជា មិនទទួលបានមកុដជាបុរសឯក ក្នុងវគ្គបញ្ចប់ក្តី។
ជាការពិត កម្មវិធីលំដាប់ថ្នាក់ពិភពលោក «Mister & Miss Asian International» 2019 គឺជាការប្រកួតសម្រស់ និងសមត្ថភាពកម្រិតអន្តរជាតិ ដែលក្នុងឆ្នាំនេះ គឺធ្វើឡើងនៅទីក្រុងបាងកក ប្រទេសថៃ ហើយឈានចូលវគ្គផ្ដាច់ព្រ័ត្រ កាលពីយប់ថ្ងៃទី២៤ ខែកុម្ភៈ ឆ្នាំ២០១៩។ បើយោងតាមរយៈផេកផ្លូវការ របស់កម្មវិធីនេះ បានឱ្យដឹងថា បេក្ខជនតំណាងកម្ពុជា លោក ឡៅ បញ្ញា ទទួលបានចំណាត់ថ្នាក់ផ្ទួនគ្នា ជាច្រើនផ្នែក គួរជាទីមោទន ដោយក្នុងនោះរួមមាន៖ ចំណាត់ថ្នាក់ «1st Runner Up» ឬហៅថាចំណាត់ថ្នាក់រង (ចំណាត់ថ្នាក់លេខ២) សម្រាប់ការប្រកួតផ្នែកបុរស, ចំណាត់ថ្នាក់ «Best Smile» ឬជាបេក្ខជន ដែលញញឹមស្រស់ជាងគេ ព្រមទាំងចំណាត់២ទៀត គឺចំណាត់ថ្នាក់ «2nd Runner Up Best Physique» និងចំណាត់ថ្នាក់ «2nd Runner Up Best National Custom» ដែលជាចំណាត់ថ្នាក់លេខ៣ ខាងរូបសម្បត្តិល្អ និងគ្រងឈុតសំលៀកបំពាក់បែបប្រពៃណី សាកសមបំផុត។ ចំណែកឯ បេក្ខជនដែលទទួលបានមកុដបុរសឯក គឺបានទៅលើ បេក្ខជនមកពីប្រទេសសិង្ហបុរី និងជ័យលាភីផ្នែកនារី បានទៅលើស្រីស្អាត មកពីប្រទេសថៃ ដែលជាម្ចាស់ផ្ទះ។
តាមរយៈការប្រកួត ពីមួយវគ្គទៅមួយវគ្គ ទស្សនិកជនសង្កេតឃើញថា បេក្ខជន ឡៅ បញ្ញា ពិតជាបានបញ្ចេញនូវទេពកោសល្យរបស់ខ្លួន យ៉ាងអស់ពីសមត្ថភាព ដើម្បីដណ្តើមបានជយលាភីក្នុងកម្មវិធី។ តែរហូតមកទល់នឹងពេលនេះ ទោះលទ្ធផលមិនជាប់ជាបុរសឯកក្តី តែលោក បានធ្វើឱ្យទស្សនិកជនជាច្រើន មានមោទនភាពចំពោះលោក។ ព្រោះវាជាកិត្តិយសដ៏ធំមួយ ដែលបានចូលរួមប្រកួតលើឆាកអន្តរជាតិដ៏ធំមួយនេះ និងបានបញ្ចេញសមត្ថភាព បង្ហាញពីសិល្បៈវប្បធម៌ សម្លៀកបំពាក់ប្រពៃណីរបស់ខ្មែរ ឱ្យបរទេសបានស្គាល់ ប្រទេសកម្ពុជាកាន់តែច្រើន៕
