(ភ្នំពេញ)៖ មួយរយៈចុងក្រោយនេះ មានការព្រួយបារម្ភយ៉ាងខ្លាំង ពីសំណាក់បងប្អូនប្រជាពលរដ្ឋ ក្រោយផ្ទុះករណីមានអ្នកស្លាប់ ដោយសារឆ្កែខាំ ឬឆ្មាខាំ រហូតដល់មានប្រជាពលរដ្ឋជាច្រើនកុះករ បន្ដនាំកូនចៅទៅ ចាក់ថ្នាំបង្ការជំងឺឆ្កែឆ្កួត នៅវិទ្យាស្ថានប៉ាស្ទ័រកម្ពុជា ជាបន្តបន្ទាប់។ ជាមួយគ្នានេះ តារាសម្ដែង និងជាពិធីករទូរទស្សន៍ Fresh news លោក ម៉ឺន ឯកសុភារិទ្ធ បានសម្ដែងក្ដីព្រួយបារម្ភយ៉ាងខ្លាំង ខណៈដែលលោកចេញទៅសម្តែងនៅខេត្តកំពង់ឆ្នាំង ក៏ស្រាប់តែជួបរឿងមិនល្អ ដោយត្រូវឆ្កែខាំលោកត្រូវចំខាងលើកែងជើង។ តែអ្វីដែលគួរឲ្យព្រួយបារម្ភខ្លាំងបំផុតនោះ គឺលោកកំពុងតែមិនស្រួលខ្លួន វិលមុខ និងឈឺក្បាលផងដែរ។
ជាក់ស្ដែង លោក ម៉ឺន ឯកសុភារិទ្ធ បានបញ្ជាក់ប្រាប់ឲ្យដឹង តាមរយៈទូរស័ព្ទ មកកាន់គេហទំព័រ Khmer Talking និង Fresh news ថា ក្រោយពេលដែលលោក ត្រូវបានឆ្កែខាំ ពេលនេះផងដែរ លោកបានទៅចាក់វ៉ាក់សាំងការពារ នៅខេត្តកំពង់ឆ្នាំងរួចរាល់ហើយ។ ដោយឡែកតែលោកនៅតែមាន អាការៈវិលមុខ ឈឺក្បាល មិនឈប់នោះទេ រហូតធ្វើឲ្យលោកនៅតែមានការព្រួយបារម្ភនៅឡើយ។
ទោះបីជាលោក ម៉ឺន ឯកសុភារិទ្ធ បានធ្វើការចាក់វ៉ាក់សាំងការពារ ដើម្បីជៀសវាងពីជំងឺដ៏កាចសាហាវ ដែលឆ្លងតាមរយៈឆ្កែខាំ នេះហើយនៅមន្ទីរពេទ្យនៅខេត្តកំពង់ឆ្នាំរួចហើយក្ដី តែលោកនៅតែមាន អាការៈវិលមុខ និងឈឺក្បាល ដែលធ្វើឲ្យលោកនៅតែមានការភ័យខ្លាច និងព្រួយបារម្ភនៅឡើយ ក្នុងនោះក៏មានអ្នកគាំទ្រ របស់លោកជាច្រើន ក៏បានជម្រុញ ឲ្យលោក ទៅបន្តការចាក់ថ្នាំការពារជាបន្តទៀត នៅវិទ្យាស្ថានប៉ាស្ទ័រកម្ពុជា។
គួរបញ្ជាក់ថា រហូតមកទល់ពេលនេះ ជំងឺឆ្កែឆ្កួត នៅតែជាបញ្ហាដល់គួរឲ្យព្រួយបារម្ភ ខណៈដែលកាលពីប៉ុន្មានថ្ងៃមុននេះ មានមនុស្ស២នាក់ហើយ បានស្លាប់ជាបន្ដបន្ទាប់ ដោយសារតែឆ្កែ និងឆ្មាខាំ បន្ទាប់ពីពួកគេមិនធ្លាប់បានចាក់វ៉ាក់សាំងបង្ការ ជំងឺមួយនេះពីមុនមកនោះទេ៕
