(ក្រុងឡុងដ៍)៖ ក្រុមស្រាវជ្រាវដ៏លេចធ្លោមួយបានសន្និដ្ឋានថា ការចាកចេញរបស់អង់គ្លេសពីសហភាពអឺរ៉ុប (Brexit) បានធ្វើឱ្យសេដ្ឋកិច្ចរបស់ចក្រភពអង់គ្លេសមានទំហំតូចជាងមុន ៥,៥% ធៀបនឹងមុនពេលចាកចេញពីអឺរ៉ុប ហើយបានបង្កឱ្យមានបញ្ហាថវិកាសម្រាប់ចំណាយលើវិស័យសេវាសាធារណៈទៀតផង។ នេះបើយោងតាមទីភ្នាក់ងារព័ត៌មាន Bloomberg។

ទីភ្នាក់ងារព័ត៌មាន Bloomberg បានរាយការណ៍ដោយដកស្រង់សម្ដីរបស់ស្ថាប័នស្រាវជ្រាវមួយដែលមានឈ្មោះថា មជ្ឈមណ្ឌលកំណែទម្រង់សេដ្ឋកិច្ច (CER) ថា កំណើនសេដ្ឋកិច្ចយឺតក៏កំពុងដាក់បន្ទុកលើប្រាក់ចំណូលរបស់ក្រសួងរតនាគារអង់គ្លេសផងដែរ និងថា ការដំឡើងពន្ធដែលបានប្រកាសនៅក្នុងសេចក្តីថ្លែងការណ៍សារពើពន្ធនៅរដូវស្លឹកឈើជ្រុះ នឹងមិនមានភាពចាំបាច់ទេប្រសិនបើចក្រភពអង់គ្លេសនៅតែស្ថិតក្នុងទីផ្សាររួមរបស់សហភាពអឺរ៉ុប។

ការរកឃើញនេះគឺលទ្ធផលស្រាវជ្រាវចុងក្រោយបំផុតដែលបង្ហាញពីការចំណាយលើ Brexit ដែលកំពុងដាក់បន្ទុកលើកិច្ចប្រឹងប្រែងរបស់លោកនាយករដ្ឋមន្ត្រី Rishi Sunak ដើម្បីទាញសេដ្ឋកិច្ចចក្រភពអង់គ្លេសឱ្យចាកចេញពីការដើរថយក្រោយនៃសេដ្ឋកិច្ចដែលអាចមានរយៈពេលរហូតដល់ការបោះឆ្នោតបន្ទាប់។

លោកនាយករដ្ឋមន្ត្រី Sunak កំពុងប្រកាន់ជំហររឹងមាំក្នុងការប្តេជ្ញាចិត្តរបស់លោកចំពោះការដំឡើងប្រាក់ឈ្នួលដែលមានកម្រិតសម្រាប់គិលានុបដ្ឋាយិកា អ្នកបើកបររថយន្តសង្គ្រោះ និងបុគ្គលិកផ្លូវដែកដែលកំពុងដើរចេញពីការងារជាការតវ៉ា។

លោក John Springford នាយករងមជ្ឈមណ្ឌល CER បានឱ្យដឹងនៅក្នុងរបាយការណ៍ស្រាវជ្រាវនេះថា៖ «ផលប៉ះពាល់របស់ Brexit បាននាំឱ្យមានការកើនឡើងពន្ធដោយជៀសមិនរួច ពីព្រោះសេដ្ឋកិច្ចដែលលូតលាស់យឺត ទាមទារឱ្យមានការដកហូតពន្ធខ្ពស់ជាងមុន ដើម្បីផ្តល់មូលនិធិដល់សេវាសាធារណៈ និងអត្ថប្រយោជន៍នានា»។

មជ្ឈមណ្ឌល CER បានឱ្យដឹងថា ការចាកចេញពីទីផ្សាររួមរបស់សហភាពអឺរ៉ុបបានកាត់បន្ថយការវិនិយោគចំនួន ១១% និងពាណិជ្ជកម្មទំនិញចំនួន ៧% នៅក្នុងត្រីមាសទីពីរនៃឆ្នាំ២០២២។ នេះបើយោងតាមទីភ្នាក់ងារព័ត៌មាន Bloomberg៕