(ភ្នំពេញ)៖ នៅវេលាម៉ោងប្រមាណជិត៤រសៀលថ្ងៃនេះ សមត្ថកិច្ចបានសម្រេចឃាត់ខ្លួន កញ្ញា សយ ស្រីអូន ប្រធានអង្គការ «ផ្ទះក្មេងៗរបស់កម្ពុជា» បន្ទាប់ពីរងការចោទប្រកាន់វាយធ្វើបាបក្មេងពិការ នៅក្នុងអង្គការផ្ទះក្មេងៗរបស់កម្ពុជា នេះបើយោងតាមលោក ឯក ច័ន្ទមករា អគ្គលេខាធិការនៃអគ្គលេខាធិការដ្ឋាន ក្រុមប្រឹក្សាសកម្មភាពជនពិការ បានបន្តបញ្ជាក់ប្រាប់យ៉ាងដូច្នេះ។
ដោយឡែកសង្សារបស់ប្រធានអង្គការរូបនោះ សមត្ថកិច្ចនឹងបន្តតាមរក និងហៅមកសាកសួរ ពាក់ព័ន្ធនឹងករណីនេះ។
អគ្គលេខាធិការរូបនោះបានបន្តបញ្ជាក់ប្រាប់ឲ្យដឹងថា អាជ្ញាធរសម្រេចដកយកកុមារ ៤នាក់ចេញពីអង្គការ «ផ្ទះក្មេងៗរបស់កម្ពុជា» ទៅរស់នៅក្នុងអង្គការម្លប់ឫញស្សី ជាបណ្តោះអាសន្ន។
កញ្ញា សយ ស្រីអូន អាយុ ២៣ឆ្នាំ ប្រធានមណ្ឌលអង្គការផ្ទះក្មេងៗរបស់កម្ពុជា រួមនិងប្រុសស្នេហ៍ឈ្មោះ ស្រស់ អ៊ុន អាយុ ២៤ឆ្នាំ រងការចោទប្រកាន់ថា មានរំលោភបំពានលើផ្លូវកាយ វាយដំធ្វើបាបកុមារពិការ រួមទាំងរួមភេទជាមួយនិងសង្សារ ឲ្យកុមារទាំងអស់នៅក្នុងមណ្ឌលមើល នេះបើយោងតាមលិខិតជាផ្លូវការមួយ របស់លោកស្រី Chloe Flanagan ជាអ្នកផ្តល់ជំនួយតែម្នាក់គត់ ឲ្យមណ្ឌលអង្គការផ្ទះក្មេងៗរបស់កម្ពុជា ផ្ញើជូនប្រធានមនី្ទរសង្គមកិច្ច អតីតយុទ្ធជន និងយុវនីតិសម្បទា រាជធានីភ្នំពេញ។
បន្ទាប់ពីទទួលបានលិខិតជាផ្លូវការ និងមានការណែនាំពីលោក វង សូត រដ្ឋមន្រ្តីក្រសួងសង្គមកិច្ច អតីតយុទ្ធជន និងយុវនីតិសម្បទា បានចាត់ឲ្យ លោក ឯម ច័ន្ទមករា អគ្គលេខាធិការ នៃអគ្គលេខាធិការដ្ឋាន ក្រុមប្រឹក្សាសកម្មភាពជនពិការ ចុះពិនិត្យមើលករណីនេះជាបន្ទាន់ នៅរសៀលថ្ងៃទី២៣ ខែមិថុនានេះ ហើយនៅពេលនេះ លោក ឯម ច័ន្ទមករា កំពុងស្ថិតនៅអង្គការផ្ទះក្មេងៗរបស់កម្ពុជា៕
