ភ្នំពេញ៖ មន្រ្តីជាន់ខ្ពស់ ក្រសួងធនធានទឹក និងឧតុនិយម បានថ្លែងឲ្យដឹងថា ការបាត់ស្រុតដី តាមច្រាំងទន្លេសាប ស្ថិតនៅសង្កាត់ច្រាំងចំរេះទី២ ខណ្ឌឫស្សីកែវនោះ គឺ បណ្តាលមកពីសកម្មភាពរបស់មនុស្ស ដែលបានបង្ហូរទឹក ជាប្រចាំចូលទៅក្នុងទន្លេ។
លោក ចាន់ យុត្ថា នាយកខុទ្ទកាល័យ ក្រសួងធនធានទឹកបានបញ្ជាក់ថា ប្រជាពលរដ្ឋដែលរស់នៅ តាមដងទន្លេសាប បានបង្ហូរទឹកចូលទៅក្នុងទន្លេជាប្រចាំ ជាហេតុនាំដីសើម រហូតដូច្នេះហើយធ្វើឲ្យ ច្រាំងទន្លេបាក់ស្រុតតែម្តង។
លោក ចាន់ យុត្ថា បានបង្ហាញពីមូលហេតុថា កត្តានេះក៏បានកើតឡើង ដោយសារតែពុំមានប្រព័ន្ធលូ ត្រូវបានរៀបចំនៅឡើយ ដើម្បីបង្ហូរទឹកតាមផ្ទះរបស់ ប្រជាពលរដ្ឋចាក់ចូលទន្លេ ដូច្នេះលោកបានសំណូមពរ ឲ្យអាជ្ញាធរ និងមន្រ្តីជំនាញលើការងារ ជួយរៀបចំប្រព័ន្ធលូ ជៀសវាង នាំឲ្យមានហេតុការណ៍ បែបនេះកើតឡើងទៀត។
យ៉ាងណាក៏ដោយ លោក ចាន់ យុត្ថា បានថ្លែងឲ្យដឹងថា ក្រោយទទួលបានសេចក្តីរាយការណ៍ខាងលើនេះ មន្រ្តីជំនាញ និងអាជ្ញាធរមូលដ្ឋាន បានចុះទៅពិនិត្យមើលភ្លាមៗផងដែរ ។
សេចក្តីរាយការណ៍ ពីប្រជាពលរដ្ឋ បានឲ្យដឹងថា កាលពីព្រលប់ថ្ងៃទី១៧ ខែកុម្ភៈ ឆ្នាំ២០១៥ មានការបាក់ស្រុតដី នៅតាមច្រាំងទន្លេ ស្ថិតនៅសង្កាត់ច្រាំងចំរេះទី២ ខណ្ឌឫស្សីកែវ រាប់រយម៉ែត្រ ប៉ុន្តែមិនបណ្តាលឲ្យមានការប៉ះពាល់ដល់ការរស់នៅរបស់ប្រជាពលរដ្ឋនោះឡើយ៕