(ភ្នំពេញ)៖ លោក ជួន វ៉ាន់ឌន តំណាងក្រុមហ៊ុន AZ ដែលវិនិយោគលើផ្លូវជាតិលេខ៤ បានថ្លែងឲ្យដឹងនៅថ្ងៃទី១៦ ខែកុម្ភៈ ឆ្នាំ២០១៥ថា នៅក្នុងឆ្នាំ២០១៥នេះ ក្រុមហ៊ុន AZ មានគម្រោងដំឡើងស្លាកសញ្ញាចរាចរណ៍ថ្មីចំនួន ៥០០ស្លាកបន្ថែមទៀត នៅតាមបណ្តោយផ្លូវជាតិលេខ៤ ពីភ្នំពេញ ទៅខេត្តព្រះសីហនុ ដើម្បីជួយកាត់បន្ថយគ្រោះថ្នាក់ចរាចរណ៍ តាមដងផ្លូវជាតិសេដ្ឋកិច្ចមួយនេះ។ តំណាងក្រុមហ៊ុនដដែលបន្តថា តាំងពីដើមឆ្នាំរហូតមកដល់ពេលនេះ ក្រុមការងារ បានបំពាក់នូវស្លាកសញ្ញាចរាចរណ៍ថ្មី បានប្រមាណ១៤០ស្លាកហើយ ស្លាកសញ្ញាទាំងនោះភាគច្រើន គឺផ្ដោតលើការកំណត់ល្បឿនដោយសារគ្រោះថ្នាក់ចរាចរណ៍ភាគច្រើនបង្កឡើង ដោយការបើកបរហួសល្បឿនកំណត់៕